«Экстрэмісцкі» спіс Мінінфарма: YouTube-канал «Белсат shorts» і некалькі праваабарончых інтэрнэт-рэсурсаў

Увечары 21 студзеня Міністэрства інфармацыі Беларусі ў чарговы раз папоўніла Рэспубліканскі спіс экстрэмісцкіх матэрыялаў на сваім сайце.

У адпаведнасці з рашэннем суда Ленінскага раёна Магілёва ад 16 студзеня 2026 года ў гэты спіс ўключылі YouTube-канал «БЕЛСАТ SHORTS» (ідэнтыфікатар youtube.com/@belsat_shorts), які мае больш за 59 тысяч падпісчыкаў. Гэта адзін з інтэрнэт-рэсурсаў незалежнага беларускамоўнага тэлеканала «Белсат», які вядзе вяшчанне з тэрыторыі Польшчы. Раней, 3 лістапада 2021 года, рашэннем Міністэрства ўнутраных спраў Беларусі тэлеканал быў абвешчаны «экстрэмісцкім фармаваннем».

Суд Баранавіцкага раёна і г. Баранавічы 16 студзеня 2026 года пастанавіў лічыць «экстрэмісцкай інфармацыйнай прадукцыяй» сайт free­vi­as­na (ідэнтыфікатар freeviasna.org/en), прысвечаны беларускім палітзняволеным праваабаронцам.

У той самы дзень суд Баранавіцкага раёна і г. Баранавічы прызнаў  «экстрэмісцкай інфармацыйнай прадукцыяй» сайт dp.spring96  (ідэнтыфікатар dp.spring96.org). Гэта сайт праваабарончай кампаніі «НЕ смяротнаму пакаранню», на ім прапануецца падпісаць петыцыю з патрабаваннем адмяніць смяротнае пакаранне ў Беларусі.

Таксама 16 студзеня 2026 года суд Баранавіцкага раёна і г. Баранавічы  вырашыў, што «экстрэмісцкая інфармацыйная прадукцыя» размешчаная і ў TikТоk-акаўнце «Вясна» (ідэнтыфікатар tiktok.com/@viasna96.org/en). Гэта інтэрнэт-рэсурс Праваабарончага цэнтра «Вясна».