Памёр заснавальнік газеты «Белорусы и рынок» Вячаслаў Хадасоўскі

Ва ўзросце 78 гадоў пасля працяглай хваробы 30 снежня пайшоў з жыцця заснавальнік і былы галоўны рэдактар газеты «Белорусы и рынок» Вячаслаў Хадасоўскі. Пра гэта паведаміла яго нявестка Марына Хадасоўская на сваёй старонцы ў Фэйсбуку.

Фота: старонка Марыны Хадасоўскай у «Фэйсбуку»

Як газета “Белорусы и рынок” (раней “Белорусский рынок”, вымушана перайменаваны ў 2005 годзе пасля змены заканадаўства) выдаваліся з канца 1990 года — спачатку ў фармаце штотыднёвіка, затым да 2023 года раз у месяц. Заснавальнік і выдавец — ЗАТ “Медыярынак”.

Хадасоўскі быў галоўным рэдактарам выдання да 2015 года.

1 снежня 2022 Міністэрства інфармацыі анулявала рэгістрацыю друкаванага СМІ “Белорусы и рынок”.

23 ліпеня 2022 года Мінінфарм заблакаваў доступ да сайта выдання “Белорусы и рынок” (belmarket.by) “з прычыны распаўсюду на сайце выдання гіперспасылак на матэрыялы, якія прызнаныя судом экстрэмісцкімі”. Сайт быў даступны за межамі краіны, аднак на ім абнаўляўся толькі раздзел навін. Пазней сайт разблакавалі.

Зараз сайт адкрываецца з‑за мяжы і ў Беларусі.

6 красавіка 2023 года Мінскі гарадскі суд прыгаварыў да 4 гадоў пазбаўлення волі Канстанціна Залатых — дырэктара кампаніі “Медыярынак”, якая валодае выданнем “Белорусы и рынок”.

Залатых абвінавачвалі ў “распальванні сацыяльнай варожасці і варажнечы” (ч. 2 арт. 130 Крымінальнага кодэкса), “абразе прэзідэнта” (ч. 1 арт. 368), “абразе прадстаўніка ўлады” (арт. 369), “перавышэнні службовых паўнамоцтваў” (ч. 2 арт. 426).

Аб выхадзе на волю паведамлялася 23 кастрычніка 2025 года. Адзначалася, што ён цалкам адбыў тэрмін зняволення. У снежні пераехаў у Варшаву.

У лютым 2024 года ў Варшаве на 50‑м годзе жыцця памёр галоўны рэдактар “Белорусы и рынок” Андрэй Аляксандравіч. Ён пакінуў Беларусь у траўні 2023 года.