У «экстрэмісцкі» спіс Мінінфарма ўключылі англамоўныя сацсеткі «Белсата» і TikTok праекта «Перетрем с Халезиным»

Міністэрства інфармацыі Беларусі 13 красавіка ў чарговы раз папоўніла на сваім сайце Рэспубліканскі спіс экстрэмісцкіх матэрыялаў.

«Экстрэмісцкай інфармацыйнай прадукцыяй» прызнаныя дзве старонкі ў сацыяльных сетках, звязаныя з незалежным тэлеканалам «Белсат». Гэта акаўнт у Face­book з назвай Bel­sat in Eng­lish (ідэнтыфікатар facebook.com/belsat.eng) і акаўнт Х з назвай Bel­sat in Eng­lish (ідэнтыфікатар x.com/belsat_eng). Адпаведнае рашэнне 10 красавіка 2026 года прыняў суд Ленінскага раёна Гродна.

У Рэспубліканскі спіс экстрэмісцкіх матэрыялаў ўжо былі ўнесеныя некалькі дзясяткаў розных інтэрнэт-рэсурсаў, афіляваных з тэлеканалам «Белсат». 3 лістапада 2021 года рашэннем Міністэрства ўнутраных спраў Беларусі тэлеканал абвешчаны «экстрэмісцкім фармаваннем».

«Экстрэмісцкімі матэрыяламі» прызнаны змест акаўнта ў Tik­Tok з назвай freekuhar (ідэнтыфікатар tiktok.com/@freekuhar). Такое рашэнне прыняў 9 красавіка 2026 года суд Ленінскага раёна Магілёва. Акаўнт мае 1268 падпісчыкаў, ён з’яўляецца адным з інтэрнэт-рэсурсаў ток-шоу «Перетрем с Халезиным», дзе блогер, мастацкі кіраўнік «Свабоднага тэатра» Мікалай Халезін абмяркоўвае з суразмоўцамі сітуацыю ў Беларусі і свеце. Аднайменныя YouTube-канал і старонка ў Insta­gram былі ўключаныя ў Рэспубліканскі спіс экстрэмісцкіх матэрыялаў яшчэ летась.