У кватэру да блогера Vadimati з ператрусам прыйшлі сілавікі

Пра ператрус у экс-палітвязня Вадзіма Ермашука паведамілі Telegram-каналы, звязаныя з сілавікамі.

Блогер Вадзім Ермашук (Vadi­mati). Фота: Сяргей Людкевіч / Hrodna.life

Яны сцвярджаюць, што ператрус звязаны з удзелам у акцыях у Варшаве, прымеркаваных да прэзідэнцкіх выбараў.

Вадзім сапраўды паказваў сторыс з маршу. Інфармацыю пра ператрус пацвердзіла і крыніца Hrodna.life.

Следчы камітэт ідэнтыфікаваў 365 удзельнікаў акцый за мяжой. Ён паведаміў, што 26 студзеня «для імітацыі падтрымкі экстрэмісцкіх ячэек, якія знаходзяцца ў бягах, у розных краінах былі арганізаваныя малалікія вулічныя акцыі». Яны прайшлі ва Уроцлаве, Варшаве, Беластоку, Вільні, Нью-Ёрку і Празе.

На ўдзельнікаў акцый абяцалі завесці завочныя крымінальныя справы. У іх правяраюць маёмасць і нерухомасць.

Раней стала вядома, што на падставе пастановы следчага ў блогера Vadi­mati арыштавалі маёмасць у Беларусі.