Распачаўся збор сродкаў на адвакатаў для Андрэя Гнёта

Пазасудовая калегія Вышэйшага адміністрацыйнага суда ў Бялградзе 1 красавіка разгледзіць справу аб экстрадыцыі з Сербіі беларускага рэжысёра і журналіста Андрэя Гнёта. Сябры Гнёта, які ўтрымліваецца пад вартай у Бялградзе, адкрылі збор для аплаты паслуг адвакатаў.

Андрэй Гнёт. Фота: andrewgny­ot / Insta­gram

Як паведаміла “Позірку” прэс-сакратар Народнага антыкрызіснага ўпраўлення (НАУ) Юлія Гарачая, справай рэжысёра займаюцца чатыры адвакаты, іх праца працягваецца ўжо пяты месяц. У бацькоў затрыманага грошай на аплату іх працы няма, удакладніла Гарачая.

На першым пасяджэнні пазасудовай калегіі 26 сакавіка 2024 года прысутнічалі прадстаўнікі дыппрадстаўніцтваў еўрапейскіх краін і праваабаронцы. Еўрадыпламаты былі запрошаныя на пасяджэнне беларускімі дэмакратычнымі сіламі.

Кіраўнік НАУ Павел Латушка 21 сакавіка на пікеце каля сербскай амбасады ў Варшаве заклікаў Бялград вызваліць Гнёта.

“Я спадзяюся, што еўрапейская Сербія, якая крочыць на шляху да дэмакратыі і будучага сяброўства ў ЕС, пачуе голас еўрапейскіх беларусаў і вызваліць Андрэя Гнёта, закладніка рэжыму Лукашэнкі ў сербскай турме”, — заявіў Латушка на акцыі, якая была ініцыяваная НАУ, арганізацыяй беларускіх нацыяналістаў “Рух” і Свабодным аб’яднаннем спартсменаў (SOS.by).

“Калі Сербія сапраўды імкнецца да дэмакратыі, яна павінна разумець, як сёння катуюць і зневажаюць беларускі народ, як у турмах трымаюць тысячы палітычных зняволеных, не менш за пяць з якіх ужо загінулі ў турмах Лукашэнкі”, — лічыць Латушка. Ён таксама падзякаваў еўрапейскім дэпутатам і дыпламатам, якія ўвайшлі ў створаную беларускімі дэмакратычнымі сіламі працоўную групу, якая дамагаецца вызвалення рэжысёра.

Паводле інфармацыі аб’яднання былых сілавікоў BelPol, 41-гадовы рэжысёр Андрэй Гнёт быў затрыманы 30 кастрычніка 2023 года памежнай службай Сербіі пасля прылёту ў сталіцу краіны Бялград, пасля чаго перададзены паліцыі.

Прычына затрымання — знаходжанне ў міжнародным вышуку на запыт Нацыянальнага цэнтральнага бюро Інтэрпола Беларусі ад 21 верасня 2023 года. Мэта запыту — экстрадыцыя ў Беларусь для крымінальнага пераследу.

29 лютага праваабарончы цэнтр “Вясна” паведаміў, што Інтэрпол заблакаваў даныя Гнёта, пачаўшы праверку падстаў, па якіх беларускія ўлады абвясцілі яго ў вышук. Адвакат рэжысёра настойвае, што падабаронны пераследуецца па палітычных, а не эканамічных матывах, як заяўляюць у Мінску.

12 сакавіка Апеляцыйны суд у Бялградзе адмяніў рашэнне аб экстрадыцыі Гнёта ў Беларусь. Справа адпраўленая на новы разгляд, які прайшоў 26 сакавіка.

Адмена рашэння аб экстрадыцыі ў Беларусь і накіраванне справы на новы разгляд у Вышэйшы адміністрацыйны суд у Бялградзе дае падставу спадзявацца на яго вызваленне, заявіла ў каментары “Позірку” дарадца дэмакратычнага лідара Святланы Ціханоўскай па прававых пытаннях Крысціна Рыхтар.

Андрэй Гнёт — рэжысёр тэлерэкламы і музычных кліпаў, журналіст. Займаўся вытворчасцю відэапрадукцыі для свабоднага аб’яднання спартсменаў (SOS.by), якое ў Беларусі прызнанае “экстрэмісцкім фарміраваннем”.

У траўні 2022 года выйграў конкурс Effie Awards Rus­sia. У 2016‑м партал marketing.by паведамляў, што Гнёт з’яўляецца “адным з самых вядомых і запатрабаваных” беларускіх рэжысёраў, сярод яго кліентаў такія вядомыя айчынныя брэнды, як МТС, Mark Formelle, “Бульбашъ”, “Аліварыя”, “Спартак”, “Беллакт”, World Of Tanks.