У конкурсе «Вольнае слова» ўдзельнічаюць больш за дзве сотні матэрыялаў

У суботу завяршыўся прыём матэрыялаў на галоўны журналісцкі конкурс «Вольнае слова». Сёлета на конкурс калегі даслалі 217 матэрыялаў альбо цыкл. Як і ў мінулым годзе, ва ўсіх намінацыях, акрамя «Журналісцкага расследавання», журы будзе асобна ацэньваць тэкставыя/радыйныя і відэапрацы. Для апошніх прадугледжана і асобная ўзнагарода.

Што да намінацый, то яны засталіся нязменнымі: «Найлепшы інфармацыйны матэрыял», «Найлепшая аналітычная публікацыя», «Найлепшая публікацыя мастацка-публіцыстычнага жанру» і «Журналісцкае расследаванне». У апошнюю намінацыю, дарэчы, прыйшло ажно 30 матэрыялаў.

Адметна, што сёлета пераможцы будуць абвешчаныя ў верасні падчас святкавання 30-годдзя Беларускай асацыяцыі журналістаў.

Конкурс «Вольнае слова» пакліканы адзначаць і ўганараваць лепшыя публікацыі беларускіх журналістаў і журналістак незалежна ад таго, дзе яны знаходзяцца — у самой Беларусі ці за межамі.