Тэрміновая заява. Аб неабходнасці вызвалення ўсіх журналістаў з турмаў у Беларусі

На З’ездзе Еўрапейскай федэрацыі журналістаў (EFJ) у Будапешце, дзе прысутнічаюць прадстаўнікі БАЖ, была прынятая тэрміновая заява датычна беларускіх журналістаў-палітвязняў.

Намеснік старшыні БАЖ БАрыс Гарэцкі на з’ездзе ЕФЖ. Будапешт, 3 чэрвеня 2025 года. Фота: БАЖ

З 2020 года ў Беларусі працягваюцца татальныя рэпрэсіі супраць журналістаў і СМІ. Праца незалежных грамадска-палітычных рэдакцый стала немагчымай з прычыны беспрэцэдэнтнага ціску з боку ўладаў. Дзясяткі рэдакцый незалежных СМІ былі вымушаныя пакінуць Беларусь, каб працягваць сваю працу для замежнай беларускай аўдыторыі.

Рэжым Аляксандра Лукашэнкі працягвае абмяжоўваць доступ да свабоднай інфармацыі. Больш за 2000 грамадска-палітычных і медыйных сайтаў былі заблакаваныя і забароненыя ўладамі ў Беларусі. Грамадзяне падвяргаюцца рэпрэсіям нават за факт падпіскі на незалежныя СМІ ў Інтэрнэце.

У Беларусі ўлады забаранілі працу Беларускай асацыяцыі журналістаў (сябра EFJ), а журналісты падвяргаюцца крымінальнай адказнасці за факт удзелу ў БАЖ.

Паводле Беларускай асацыяцыі журналістаў, цяпер у Беларусі за кратамі знаходзяцца 39 прадстаўнікоў СМІ: Кацярына Андрэева, Ігар Лосік, Андрэй Аляксандраў, Дзяніс Івашын, Анджэй Пачобут, Марына Золатава, Людміла Чэкіна, Валерыя Касцюгова, Дзмітрый Наважылаў, Ірына Слаўнікава, Сяргей Сацук, Канстанцін Залатых, Павел Мажэйка, Яўген Меркіс, Дзмітрый Семчанка, Андрэй Фамін, Ларыса Шчыракова, Павел Падабед, Вячаслаў Лазараў, Аляксандр Манцэвіч, Ігар Карней, Алесь Сабалеўскі, Аляксандр Ігнацюк, Яўген Глушкоў, Алесь Марчанка, Вольга Радзівонава, Антон Казельскі, Алена Цімашчук, Данііл Палянскі, Яўген Нікалаевіч, Ігар Ільяш, Сяргей Чабоцька, Руслан Равяка, Алег Супрунюк, Паліна Піткевіч, супрацоўнікі рэдакцыі Intex-press.

У сувязі з гэтым з’езд EFJ патрабуе ад Беларусі неадкладнага вызвалення ўсіх зняволеных журналістаў.  З’езд EFJ заклікае ўсіх міжнародных суб’ектаў аказаць ціск на ўлады Беларусі з мэтай вызвалення зняволеных і спынення рэпрэсій, а таксама спрыяць стварэнню магчымасцей для працягу дзейнасці незалежных СМІ для беларускага грамадства.