У Гомелі прайшоў трэнінг пра фотарэпартаж: як хутка яго зрабіць і прадаць

Амаль паўтара дзясятка ўдзельнікаў трэнінгу спасцігалі кампазіцыйныя, структурныя і тэхнічныя асновы фотарэпартажу, спосабы апрацоўкі здымкаў і хуткай адпраўкі іх на патрэбны адрас. Вучыліся адрозніваць фотарэпартаж ад фотагісторыі, знаёміліся са стандартнымі патрабаваннямі да фотарэпартажу ў друкаваных СМІ і інтэрнэт-выданнях, абмяркоўвалі пытанні супрацоўніцтва з фотаагенствамі.  Зладжаны быў таксама грунтоўны разбор фотаздымкаў удзельнікаў трэнінгу.

“Гэта ўжо не першы трэнінг па журналістыцы для маладых гамельчукоў, якія заявілі пра сябе як фрылансеры, – расказвае намесніца старшыні Гомельскай філіі ГА “БАЖ” Ларыса Шчыракова. – Дзеля навучання і створана адмысловая  пляцоўка на вуліцы Працоўнай, якая атрымала назву “Медыяпрастора”.

Папярэднія трэнінгі ў “Медыяпрасторы” прысвячаліся інфармацыйным жанрам, відэаздымкам інтэрв’ю. Сюды прыходзяць журналісты, мастакі, грамадскія актывісты, каб падзяліцца сваім бачаннем сітуацыі ў горадзе і краіне, адказаць на пытанні  фрылансераў.