«Экстрэмісцкім фармаваннем» прызналі праект «Народны рэпарцёр»
Паводле сайта МУС ад 8 траўня 2024 года, рашэнне «Аб прызнанні групы грамадзян экстрэміскім фармаваннем і забароне ягонай дзейнасці» прынята Міністэрствам унутраных справаў у гэты самы дзень. У рашэнні згадваюцца прозвішчы экс-палітвязняў, блогераў Аляксандра Кабанава і Сяргея Пятрухіна як удзельнікаў фармавання.
У «Пераліку арганізацый, фармаванняў, індывідуальных прадпрымальнікаў, датычных да экстрэмісцкай дзейнасці» згадваюцца сацыяльныя сеткі і інтэрнэт-рэсурсы, праз якія, паводле МУС, блогеры займаліся «арганізацыяй дзейнасці па падрыхтоўцы здзяйснення замахаў на суверэнітэт і грамадскую бяспеку Рэспублікі Беларусь, дыскрэдытацыяй і абразамі службовых асобаў».
-YouTube-каналы «НАРОДНЫЙ РЕПОРТЁР» (youtube.com/@narodnyjreporter і youtube.com/channel/UC0oLxL8yFsl6KyXdDgnJi4g), «Ютуб Депутаты» (youtube.com/@user-tx5wd5nv6p і youtube.com/channel/UCYPP3bSR4blFJIGQiNE2u9w); «reporter ludowy» (youtube.com/wujek-piotrek1971 і youtube.com/channel/UCzdY9_UYMVbtRRYLJzJSeLA );
- канал «Народный репортёр» на відэахостынгу RuTube (rutube.ru/channel/282532);
- старонка «NarodnyReporter» на платфэрме DonationAlerts (donationalerts.com/r/narodnyreporter);
- акаўнт «Народный Репортёр» на платформе Patreon (patreon.com/NarodnyReporter);
- Telegram-канал «Народный Репортер» (t.me/narodnireporter);
- Telegram-бот «Народный Репортер» з ідэнтыфікатарам @narodny_reporter_bot і Telegram-бот «Народный Репортер» з ідэнтыфікатарм @narod_reporter_bot ;
- старонкі з назвай «НАРОДНЫЙ РЕПОРТЕР» у сацыяльнах сетках «ВКонтакте», «Одноклассники», Facebook, Instagram,
- старонкі ў TikTok з назвамі «NARODNYREPORTER» і «Javier from Belarus»;
- адрасы электроннай пошты applepajaro@gmail.com, brestovl.sp@gmail.com, stopzawod@gmail.com;
- асабістыя старонкі Сяргея Пятрухіна і Аляксандра Кабанава ў сацыяльных сетках «ВКонтакте», «Одноклассники» , Facebook і Instagram.
«Экстрэмісцкімі» прызнаныя і два лагатыпы: «у выглядзе рупара чырвонага колеру са змешчанай унутры гарызантальнай рунай молніі чырвонага колеру» і «ў выглядзе бясформеннай плямы чырвонага колеру з размешчаным зверху сімвалам кнопкі «Play» чырвона-белага колеру».
«Народны рэпарцёр» расказвае пра асноўныя сацыяльна-палітычныя падзеі ў Беларусі. Праект заснаваў экс-палітвязень Сяргей Пятрухін, асуджаны ў 2021 годзе паводле арт. 342 КК (Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх), арт. 369 КК (Абраза прадстаўніка ўлады), арт. 391 КК (Абраза суддзі). Пазней да Пятрухіна далучыўся экс-палітвязень Аляксандр Кабанаў, гэтаксама асуджаны ў 2021 годзе па арт. 342 КК (Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх) і арт. 369 (Знявага прадстаўніка ўлады).
Абодва выйшлі на волю ў снежні 2022 года, цалкам адбыўшы прысуджаныя тэрміны зняволення, і ў розны час з’ехалі з Беларусі.
Паводле дзеючага беларускага заканадаўства, асобы, прызнаныя ўдзельнікамі экстрэмісцкага фармавання, могуць быць прыцягнутыя да крымінальнай адказнасці па артыкулах «Стварэнне экстрэмісцкага фармавання альбо ўдзел у ім» (арт. 361–1 КК) ці за «Садзейнічанне экстрэмісцкай дзейнасці» (арт. 361–4 КК). Санкцыі гэтых артыкулаў — да 10 гадоў пазбаўлення волі.