Сацсеткі блогеркі Розы Бабаханян трапілі ў «экстрэмісцкі спіс» Мінінфарма

Міністэрства інфармацыі Беларусі 27 лютага  папоўніла «Рэспубліканскі спіс экстрэмісцкіх матэрыялаў».

Фота: pexels.com

У спіс на падставе рашэння суда Ленінскага раёна горада Гродна ад 21 лютага 2025 года ведамства ўключыла Telegram-канал з назвай «Ліхтар» (ідэнтыфікатар t.me/lichtare) і Telegram-чат з такой самай назвай. «Экстрэмісцкім» прызнаны і лагатып Telegram-канала. Паводле апісання на сайце Мінінфарма — «чорна-белая выява круглай формы з чорна-шэрым фонам, на якім намалявана літара  «L», размешчаная па цэнтры ў святле пражэктара».

«Ліхтар» — гэта новы праект незалежнага беларускамоўнага выдання «Новы Час».

Рашэннем суда Лідскага раёна Гродненскай вобласці ад 25 лютага 2025 года «экстрэмісцкімі матэрыяламі» абвешчаны Іnsta­gram-акаўнт з назвай «nexta_live_belarus» (ідэнтыфікатар instagram.com/nexta_live_belarus). А таксама яго лагатып — «у выглядзе літары «N» сіняга колеру, літары «L» чырвонага колеру і літары «B» фіялетавага колеру, размешчаных у вертыкальным становішчы на белым фоне».

24 лютага суд Чыгуначнага раёна горада Гомеля пастанавіў лічыць «экстрэмісцкай інфармацыйнай прадукцыяй» змест шэрагу старонак у сацыяльных сетках і месенджарах блогеркі Розы  Бабаханян. Блогерка мае беларускае і армянскае грамадзянства, апошнія 27 гадоў жыла ў Беларусі. Нядаўна яе пакаралі арыштам па абвінавачанні ў «распаўсюдзе экстрэмізму» паводле ч. 2 арт. 19.11 КаАП, а потым вывезлі ў Арменію.

У «Рэспубліканскі спіс экстрэмісцкіх матэрыялаў» унесеныя:

• Insta­gram-акаўнт з назвай «bel­la­hayas­tan» (ідэнтыфікатар  instagram.com/bellahayastan),
• Face­book-акаўнт з назвай «Белла Белла» (ідэнтыфікатар facebook.com/profile.php?id=100089368449997), які мае 15000 падпісчыкаў,
• старонка ў «Одноклассниках» з назвай «Белла» (ідэнтыфікатар ok.ru/profile/560528510792), на якую падпісаны 9648 чалавек),
• YouTube-канал «У Беллы» (ідэнтыфікатар   youtube.com/@bellakirovakan),
• Telegram-канал «У Беллы1» (ідэнтыфікатар t.me/bella777111),
• Telegram-группа «У Беллы 2» (ідэнтыфікатар t.me/bellavgneve71).