Ігар Лосік: Я мусіў выйсці ў чэрвені разам з Бяляцкім

«Я мусіў выйсці ў чэрвені разам з Бяляцкім, але нас у апошнюю хвіліну беларускія ўлады выкраслілі са спісаў і замянілі на іншых», — распавёў былы палітвязень Ігар Лосік на сваёй старонцы ў у сацыяльнай сетцы Threads.

Блогер Ігар Лосік пасля вызвалення. Вільня, 11 верасня 2025 года. Фота: «Радыё Свабода»

«Я мусіў выйсці ў чэрвені разам з Бяляцкім, але нас у апошнюю хвіліну беларускія ўлады выкраслілі са спісаў і замянілі на іншых. Бабарыку і Калеснікаву. Я ўпэўнены, таксама рыхтуюць у бліжэйшую партыю».

«Першы год атрымліваў па 50–70 лістоў за дзень. Потым усе заблакавалі і з лютага 2023 года ніводнага ліста не атрымаў, быў у рэжыме «інкамунікада». Лісты вельмі моцна падтрымлівалі маральна».

«Кнігі нельга толькі калі пападаеш у карцэр або ў ШІЗА. У бібліятэцы на лагеры ў Наваполацку быў выдатны выбар кніг, але не было часу чытаць. Працавалі 6 дзён у тыдзень за заробак у 30 цэнтаў у месяц. Але кніг я прачытаў вялікае мноства».

«Смяяліся і прыколваліся амаль кожны дзень, за гэта часта атрымлівалі. Калі на лагеры быў, было весела, таму што шмат добрых людзей было вакол і з такімі ж перакананнямі».

Калі выйшаў, першым жаданнем было «выспацца, не прачынацца ў 5 раніцы, з’есці бургер і ўбачыць жывое зялёнае дрэва».