Офіс Святланы Ціханоўскай адзначыў новы праект БАЖ

У Міжнародны дзень правоў чалавека дарадца Святланы Ціханоўскай па прававых пытаннях Леанід Марозаў выказаў падзяку Беларускай асацыяцыі журналістаў і Алегу Агееву, а таксама камандзе Medi­aIQ за запуск новага праекта па аналізу ролі беларускай прапаганды і імаверных крымінальных злачынстваў тых, хто сапраўды распальвае варажнечу ў Беларусі. 

Дарадца Святланы Ціханоўскай па прававых пытаннях Леанід Марозаў. Фота: афіцыяльны Telegram-канал Святланы Ціханоўскай

Спадар Марозаў выказаўся пра сітуацыю з правамі і свабодамі ў Беларусі, а таксама пра важную ролю тых, хто, нягледзячы на рэпрэсіі, працягвае абараняць праўду і дакументаваць злачынствы рэжыму.

«У Міжнародны дзень правоў чалавека хачу падкрэсліць: у Беларусі правы чалавека сістэмна парушаюцца і адбываецца дзяржаўны тэрор супраць сваіх грамадзянаў. Тысячы людзей застаюцца ў няволі толькі за тое, што адважыліся быць свабоднымі і сказаць праўду. Сярод іх — праваабаронцы і журналісты, якія абаранялі іншых і цяпер самі пакараныя за сваю працу і прынцыпы.

Хачу выказаць шчырую падзяку Беларускай асацыяцыі журналістаў і Алегу Агееву, а таксама камандзе Medi­aIQ за запуск новага праекта па аналізу ролі беларускай прапаганды і імаверных крымінальных злачынстваў тых, хто сапраўды распальвае варажнечу ў Беларусі. 

Злачынствы беларускай прапаганды не застануцца незаўважанымі і беспакаранымі

Дакументаванне ролі прапаганды ў рэпрэсіях — важны крок да будучай юрыдычнай адказнасці. Ніводнае злачынства не павінна застацца без рэакцыі. На сёння праектам ужо сабраныя і выкладзены ў публічны доступ 16 кейсаў. І гэта толькі пачатак. 

Беларусы і беларускі ўнутры краіны і за яе межамі працягваюць змагацца, падтрымліваць адно аднаго і будаваць будучыню без страху і рэпрэсіяў».