Адказ БАЖ на Адкрыты ліст ад беларускай фемінісцкай супольнасці

Беларуская фемінісцкая супольнасць звярнулася да журналісцкай супольнасці і Беларускай асацыяцыі журналістаў з адкрытым лістом.

Адказ БАЖ на Адкрыты ліст ад беларускай фемінісцкай супольнасці

На адкрыты ліст ад 11 сакавіка 2024 г.

Мы рашуча асуджаем любы хатні гвалт, як і іншыя формы гвалту. І падзяляем ваш пункт гледжання, што гвалт у адносінах да жанчын з’яўляецца грубым парушэннем правоў і асноўных свабод жанчын і пагаршае або зводзіць на нішто ажыццяўленне гэтых правоў і свабод.

Тыя праблемы, якія вы ўзнялі ў сваім лісце, турбуюць і Беларускую асацыяцыю журналістаў (далей па тэксце – БАЖ). Пазіцыя БАЖ пра недапушчальнасць любога гвалту была сфармулявана на самым пачатку існавання нашай арганізацыі. У Дэкларацыі прынцыпаў прафесійнай этыкі журналістаў, які падпісвае кожны сябра арганізацыі, зафіксавана, што сябры БАЖ мусяць не дапускаць дыскрымінацыі паводле расавай прыналежнасці, нацыянальнасці, спавяданай рэлігіі, полу, сексуальнай арыентацыі, палітычных і іншых поглядаў і г.д.

Звяртаем вашу ўвагу, што ў кампетэнцыю Камісіі па этыцы БАЖ, дзейнасць якой была вымушана спынена ў 2021 годзе пасля прымусовай «ліквідацыі» БАЖ беларускімі ўладамі, не ўваходзіў кантроль за паўсядзённымі паводзінамі сябраў арганізацыі. Што тычыцца стварэння асобнай камісіі для разгляду скаргаў на гвалт у дачыненні да жанчын, асуджэння дзейнасці і даследавання адпаведных абвінавачванняў у дачыненні сябраў арганізацыі, то гэта не адпавядае Статуту БАЖ як прафесійнай арганізацыі і можа супярэчыць заканадаўству краін дзейнасці сябраў БАЖ.

БАЖ не мае паўнамоцтваў наўпрост умешвацца ў дзейнасць рэдакцый СМІ і ў іх працоўныя адносіны з журналістамі. Але спецыялісты і спецыялісткі БАЖ заўсёды гатовы ўдзельнічаць (пры згодзе бакоў) у працэсах медыяцыі пры разглядзе ў тым ліку і пытанняў гвалту і харасменту ў сферы працы, каб абараніць супрацоўніц і супрацоўнікаў медыяарганізацый ад прычынення фізічнай, псіхалагічнай, сексуальнай або эканамічнай шкоды, уключаючы гендарны гвалт і харасмент.

БАЖ не можа пагадзіцца з высновамі ў дачыненні незалежных СМІ, якія прыводзяцца ў вашым лісце: што беларуская журналістыка дэманструе недастатковую адчувальнасць да гендернай праблематыкі, а ў сферы медыя нібыта пераважае таксічная атмасфера.

Мы лічым важным працягваць дыялог па названых вамі праблемах для абмеркавання пытанняў дыскрымінацыі жанчын і гвалту ў дачыненні да іх, у тым ліку і ў сферы працы. Мы згодныя, што распрацоўка адпаведных унутраных дакументаў для рэдакцый СМІ і медыяарганізацый будзе спрыяць эфектыўнай барацьбе з гвалтам і харасментам унутры калектываў беларускіх незалежных медыяў.

БАЖ упэўнены, што з вашай дапамогай і прыцягненнем усіх зацікаўленых бакоў журналісцкая супольнасць зможа распрацаваць такія дакументы, якія будуць адпавядаць Канвенцыі Міжнароднай арганізацыі працы 190 «Аб гвалце і харасменце», і прытрымлівацца іх.

З павагай,

Праўленне БАЖ

08.04.2024