Узламалі дзверы і арыштавалі кватэру віцебскага журналіста Змітра Казакевіча

Незалежны журналіст з Віцебска Зміцер Казакевіч не жыве ў Беларусі са жніўня 2021 года. Увесь час, што ён знаходзіцца ў замежжы, да яго маёмасці ніхто цікаўнасці не меў. Цяпер, мяркуе журналіст, і да яе ў следчых «дайшлі рукі».

«Даведаўся ад знаёмых, што 16 траўня ў 18.40 дзверы ў кватэру ўжо былі ўзламаныя. Яны жалезныя, і трэба было прыкласці пэўныя намаганні. Кажуць, што рабілі гэта супрацоўнікі МНС, але апячатвалі іншыя структуры. На паперцы, якой апячаталі кватэру, напісана: «Апячатана. Накладзены арышт. Уваход забаронены. Супрацоўнік КДБ Красноў». Ці сапраўднае гэта прозвішча, я не ведаю, тым больш, што ніжэй дададзена: «Па ўсіх пытаннях звяртацца ў Следчы Камітэт»», — распавёў журналіст.

Па месцы прапіскі намесніка старшыні БАЖ прыходзілі з ператрусам

Што стала прычынай арышту маёмасці, Казакевіч не ведае. Прынамсі, паштовая скрыня стаіць пустая — там няма ні позваў, ні чагосьці падобнага. Але напярэдадні, як яму перадалі знаёмыя, па пад’ездзе хадзілі нейкія людзі і распытвалі, хто там жыве, што вядома пра гаспадароў, калі яны тут былі апошні раз і гэтак далей.

Кватэра прыватызаваная, удакладніў спадар Зміцер, у ёй два пакоі, дом не так даўно пабудаваны, ён знаходзіцца ў новым віцебскім мікрараёне «Медцэнтр». У кватэры прапісана няпаўнагадовае дзіця. Навошта ламалі дзверы, ці былі панятыя, ці быў у ягоным жытле ператрус і што там шукалі, журналіст не ведае:

«У прынцыпе, нічога каштоўнага там няма, апрача, хіба што, пралкі. Маёй аргтэхнікі там таксама няма — усё, што можна было, канфіскавалі яшчэ ў 2020 і 2021 гадах. У мяне тады тры разы праводзілі ператрусы, забіралі камп’ютарную тэхніку і тэлефоны. Я абсалютна не ўяўляю, з чым усё гэта звязана, — хіба што распачалі супраць мяне нейкую крымінальную справу. Днямі стала вядома, што Следчы камітэт вызначыў 104 чалавекі, якія бралі ўдзел у сёлетнім святкаванні Дня Волі. Прозвішчы пакуль не агучаныя, што да мяне, то я прыходзіў шмат на якія беларускія акцыі ў замежжы, але выключна ў якасці журналіста».

Пакуль Зміцер Казакевіч расцэньвае арышт маёмасці як своеасаблівае «запрашэнне да камунікацыі» — паколькі па ўсіх пытаннях запрашаюць звяртацца ў Следчы камітэт. Але звязвацца з прадстаўнікамі гэтай структуры журналіст пакуль не плануе. Сваю маёмасць ён лічыць арыштаванай незаконна і спадзяецца, што некалі яна будзе вернутая.