Прэзентацыя маніторынгу асвятлення выбараў у СМІ
Як беларускія СМІ асвятлялі рэгістрацыю кандыдатаў у дэпутаты? Якая інфармацыя пра магчымых будучых дэпутатаў ужо з’явілася ў прэсе і чаму інфармацыя пра выбары выходзіць на 59‑й хвіліне нядзельнага аналітычнага выпуску?
Пра ўсё гэта прадстаўнікі ГА “БАЖ” раскажуць у сераду 17 жніўня аб 11‑й гадзіне на прэзентацыі чарговага этапу маніторынгу асвятлення парламенцкіх выбараў у беларускіх СМІ.
Справаздача аб першым этапе маніторынгу
Нагадаем, што мэта маніторынгу — дапамагчы выбаршчыкам і журналісцкай супольнасці ўсвядоміць неабходнасць поўнага і ўсебаковага асвятлення выбарчага працэсу; важнасць прынцыпаў журналісцкай этыкі і міжнародных стандартаў; неабходнасць неперадузята інфармаваць выбаршчыкаў пра электаральны працэс, праграмы кандыдатаў і меркаванні іх прыхільнікаў і апанентаў.
Аб’ектамі даследавання з’яўляюцца цэнтральныя і рэгіянальныя тэле- і радыёканалы, друкаваныя выданні і вядучыя інтэрнэт-сайты. У прыватнасці праграмы “Панарама” (Беларусь 1), “Наши новости” (ОНТ), “Главный эфир” (Беларусь 1), “Радыёфакт” (Першы нацыянальны канал Беларускага радыё), “Навіны Сталіцы” (“Радыё Сталіца), “Віцебскі веснік. 7 дзен” (ТРК “Віцебск), “Навіны. Гомель” (ТРК “Гомель”), выданні “СБ.Беларусь сегодня”, “Народная Воля”, “Заря, “Intex-press”, “Комсомольская правда в Беларуси (“таўстушка”), “Газета Слонімская”, “Могилёвская Правда”, “Слонімскі веснік”, сайты www.tut.by і www.belta.by.
Прэзентацыя адбудзецца у сераду 17 жніўня аб 11‑й гадзіне ў офісе ГА “Беларуская асацыяцыя журналістаў” (г.Мінск, вул.Камсамольская 7 офіс 32). Тэлефон для даведак: +375 29–126-70–98