«Як беларус пракраўся ў кангрэс ЗША? Чым метро ў Вашынгтоне падобна да менскага? Касцюшка і Шагал — нашы? Як беларуска ў сваёй кавярні стварае бьюці-смузі і чаму дадае мяса ў халаднік?» — так анансуе першы ролік сам аўтар. У відэа Алесь Чахоўскі расказвае пра вандроўку ў Амерыку і важную місію.
YouTube-канал называецца «Алесь Чахоўскі | Беларускі вайб». У першым роліке аўтар расказвае пра паездку ў ЗША, падчас якой ён сустракаўся з шматлікімі героямі відэа. У прыватнасці, уладальніцай кавярні, прадстаўнікамі беларускай і ўкраінскай дыяспары, амерыканцамі з беларускімі каранямі.
Першае відэа атрымалася вельмі дынамічным і насычаным. А самае галоўнае, што гаворка — не толькі пра забаўляльны кантэнт.
— Я прывёз паперы, у тым ліку афіцыйны запыт ад імя Беларускай рады культуры, Беларускага інстытута ў Амерыцы і дыяспары ў ЗША аб рэідэнтыфікацыі мастакоў беларускага паходжання. Бо шмат з іх падпісаныя ў музеях і галереях як russian. Мы збіраемся гэта змяніць, — паведаміў Алесь Чахоўскі. — Важна данесці свету, якімі талентамі валодала і валодае Беларусь.
Больш інфармацыі пра ініцыятыву #art_born_Belarus можна прачытаць у сацсетках Беларускай рады культуры (напрыклад, у Telegram).