Пасля арышту выйшаў на волю журналіст Сяргей Гардзіевіч

Сяргея Гардзіевіча затрымалі 24 студзеня 2024 года супрацоўнікі Драгічынскага РАУС.  У дачыненні да яго міліцыянты склалі пратакол паводле артыкула 19.11 Адміністрацыйнага кодэкса (распаўсюд, выраб, захоўванне інфармацыйнай прадукцыі, якая змяшчае заклікі да экстрэмісцкай дзейнасці).

Да разгляду справы ў судзе журналіста  змясцілі за краты. Праз два дні, 26 студзеня, суддзя Драгічынскага раёна Юлія Кукса прызнала Гардзіевіча вінаватым у правапарушэнні і прызначыла пакаранне арыштам.

Сяргея Гардзіевіча абвінавацілі ў распаўсюдзе праз сацыяльныя сеткі ў лістападзе 2023 года «экстрэмісцкай прадукцыі». Справа тычыцца рэпосту публікацыі, размешчанай на сайце выдання «Ганцавіцкі час». Якая менавіта публікацыя мелася на ўвазе — невядома, але ў пратаколе было пазначана, што зроблена гэта з інтэрнэт-рэсурсу, які прызнаны ў Беларусі «экстрэмісцкім».

Журналіст спрабаваў давесці, што ў яго дзеяннях няма складу адміністрацыйнага правапарушэння. Больш за тое, у судзе Сяргей Гардзіевіч адзначыў, што летась у лістападзе выдаліў свой акаўнт у сацыяльнай сетцы «ВКонтакте». Але гэтыя тлумачэнні суддзя Юлія Кукса не ўзяла пад увагу.

Чытайце яшчэ:

«Як журналісты сталі галоўнымі ворагамі Лукашэнкі». Выйшаў новы фільм пра беларускіх рэпарцёраў, пратэсты і рэпрэсіі

Анджэя Пачобута змясцілі ў штрафны ізалятар, за 8 месяцаў яму не дазволілі ніводнага спаткання і ніводнай перадачы

Саша Раманава: «Цяпер перыяд ахалоджвання да пратэснага парадку дня і пошуку новых аўдыторый і стратэгій»