Штраф Дабравольскаму пакінулі ў сіле
На слуханнях 1 сакавіка суддзя Мінскага гарадскога суда Валерый Камісараў зачытаў скаргу, а таксама выслухаў тлумачэнні Паўла Дабравольскага адносна інцыдэнту з затрыманнем і збіццём 25 студзеня.
Журналіст распавёў пра абставіны здарэння, пра свой зварот у Следчы камітэт, а таксама звароты калег у Генпракуратуру, МУС, Мінінфармацыі.
Выслухаўшы гэтую інфармацыю, суддзя пакінуў рашэнне Фрунзенскага раённага суда ў сіле. Цяпер Павел Дабравольскі збіраецца дамагацца адмены штрафу ў Вярхоўным судзе.
Падтрымаць Дабравольскага прыйшлі каля 20 калег, у тым ліку старшыня ГА «БАЖ» Андрэй Бастунец. За здымкі без дазволу на мабільны тэлефон з суда выдалілі прысутную ў зале жанчыну. Таксама суддзя папярэдзіў карэспандэнтку “Нашай Нівы” Ірыну Арахоўскую тое, што зрабіла яго фота да пачатку судовага працэсу. Валерый Камісараў запатрабаваў, каб журналістка выдаліла фота ў яго на вачах.
У аўторак Мінскі гарадскі разглядаў касацыйную скаргу журналіста TUT.BY, якога месяц таму затрымалі ў будынку суда Фрунзенскага раёна, збілі, а потым аштрафавалі на 9 млн 450 тыс рублёў за нібыта непадпарадкаванне міліцыянтам і дробнае хуліганства.
За месяц, які мінуў з часу інцыдэнту, калегі журналіста звярталіся ў некалькі дзяржаўных ведамстваў з просьбай адрэагаваць на сітуацыю. Міністэрства ўнутраных спраў адразу назвала дзеянні праваахоўнікаў законнымі, міністр інфармацыі таксама стала на бок міліцыянтаў і абараняць журналіста не стала, такое ж меркаванне выказаў і міністр юстыцыі Алег Сліжэўскі.
Між тым, Следчы камітэт па-ранейшаму не азнаёміў пацярпелага журналіста з вынікамі праверкі, прызначанай па факце збіцця міліцыянтамі. Паводле Дабравольскага, следчыя нават не вярнулі яму мабільны тэлефон з запісам інцыдэнту, які прасілі на адзін дзень.
![](https://baj.media/wp-content/themes/baj/assets/images/telegram-logo.jpg)