У Лунінцы адбыўся традыцыйны круглы стол журналістаў і літаратараў

Сёлетняя тэма сустрэчы была прысвечаныя ўзаемадачыненням журналістыкі і літаратуры: што агульнага і што адрознага паміж імі, наколькі творчым заняткам можна лічыць журналістыку або гэта рамесніцтва і гэтак далей. Паколькі многія з прысутных працуюць у абедзвюх сферах, то тэма выклікала цікавасць. Меркаваннямі падзяліліся Вадзім Жылко, Мікалай Ільючык, Аляксей Белы, Людміла Хмялеўская, Алена Насковіч ды іншыя.

“Большасць выступоўцаў, сыходзячы з уласнага досведу, сышлася на тым, што абодва заняткі творчыя, таму патрабуюць здольнасцяў і “божай іскрынкі”, а таксама могуць дапамагаць адно аднаму, узаемадапаўняючы творчы патэнцыял аўтара”, — гаворыць ініцыятар творчых сустрэч Вадзім Жылко.

“Не варта лічыць журналістыку і літаратуру нейкімі антаганістычнымі заняткамі”, —  выказаўся Мікалай Ільючык, для якога гэта: “Непадзельны тандэм”.

Пасля круглага стала адбылася творчая вечарына баранавіцкіх літаратараў Раісы Раманчук, Аляксея Белага, Таццяны Яцук, Ларысы Антонавай, Рэгіны Скіпар і Ірыны Здановіч (Мезенцавай). Большасць з іх мае па некалькі кніг паэзіі і прозы, напрыклад, Аляксей Белы прадставіў свой ужо восьмы па ліку зборнік “Жыві, дзе ўдосталь ветру”. Гучалі вершы і аўтарскія песні. Слова ўзялі і лунінецкія творцы.

Фота Мікалая Ільючыка