Заява ГА «БАЖ» да 15‑й гадавіны знікнення журналіста Дзмітрыя Завадскага
Сёння спаўняецца пятнаццаць гадоў з трагічнага моманту, калі пры нявысветленых абставінах знік наш калега, сябра грамадскага аб'яднання "Беларуская асацыяцыя журналістаў", аператар Дзмітрый Завадскі.
Усе гэтыя гады праваахоўныя органы Беларусі так і не далі адказу на пытанні: хто быў арганізатарам і выканаўцам гэтага злачынства, што насамрэч здарылася з Дзмітрыем, дзе шукаць яго сляды?
У няведанні застаюцца яго родныя, блізкія сябры, усе сумленныя грамадзяне краіны, каму неабыякавы лёс Завадскага і іншых беларускіх журналістаў, што загінулі пры нявысветленых абставінах.
Крымінальную справу па факце знікнення Дзмітрыя Завадскага неаднаразова прыпынялі і аднаўлялі, але гэта нічога не мяняла: канкрэтных вынікаў як не было, так і няма.
Грамадскае аб’яднанне «Беларуская асацыяцыя журналістаў” настойліва патрабуе ад кампетэнтных праваахоўных органаў правесці поўнае расследаванне ўсіх абставін знікнення Дзмітрыя Завадскага.
Мы заклікаем прадстаўнікоў грамадзянскай супольнасці не забываць пра справу Дзмітрыя Завадскага і не даваць забыць яе ўладам да таго часу, пакуль не даведаемся ўсёй праўды пра гэтае злачынства, пакуль не будуць названыя імёны яго натхняльнікаў і выканаўцаў.
Прынята на пасяджэнні Праўлення Грамадскага аб’яднання «Беларуская асацыяцыя журналістаў» 07.07.2015 г.
![](https://baj.media/wp-content/themes/baj/assets/images/telegram-logo.jpg)