Беларускі ПЭН абвясціў прыём заявак на прэмію імя Алеся Адамовіча (дэдлайн — 20 красавіка)

Беларускі ПЭН распачынае прыём намінацый на прэмію імя Алеся Адамовіча за творы, апублікаваныя ў 2025 годзе. Прэмія ўганароўвае чалавечую годнасць, свабоду думкі і творчасці ў самых складаных умовах.

Калі вы ведаеце творы, якія дакументуюць рэчаіснасць, збіраюць праўдзівыя сведчанні пра сацыяльна-палітычнае жыццё і асвятляюць актуальныя для чалавечай супольнасці праблемы, – калі ласка, намінуйце іх.

Хто можа ўдзельнічаць?

Да ўдзелу прымаюцца:

• кнігі;
• артыкулы ў медыя;
• падкасты;
• кіна- і відэапраекты.

Галоўнае – каб твор быў апублікаваны ў 2025 годзе і працаваў з актуальнымі тэмамі сучаснасці, адкрываў прастору для асэнсавання і дыскусіі.

Хто можа намінаваць твор?

• сябры Беларускага ПЭНа;
• выдавецтвы;
• сябры журы;
• творчыя аб’яднанні, культурніцкія інстытуцыі, СМІ;
• аўтары твораў.

Іншыя фізічныя і юрыдычныя асобы могуць падаваць прапановы для заявак арганізатарам.

Для аўтараў і аўтарак няма абмежаванняў паводле ўзросту, грамадзянства, месца жыхарства або публікацыі. Падрабязнасці – у Статуце і Рэгламенце прэміі.

Як падаць заяўку?

Заяўкі прымаюцца да 20 красавіка 2026 года (23:59 беларускага часу).

Каб падаць заяўку, запоўніце гугл-форму.

У выпадку тэхнічных праблем матэрыялы можна дасылаць на электронны адрас aj@penbelarus.org з пазнакай «Прэмія Адамовіча 2026 / імя і прозвішча аўтара/аўтаркі/аўтараў, назва твора».

Чаму гэта важна?

Прэмія носіць імя Алеся Адамовіча – пісьменніка, які ўмеў гаварыць пра складанае і балючае так, што гэта немагчыма было ігнараваць. Сёння гэтая традыцыя працягваецца.

Арганізатары шукаюць творы, якія не толькі адлюстроўваюць рэчаіснасць, але і ўплываюць на яе. Тыя, што дапамагаюць змяняць сучаснасць дзеля будучыні.