• Актуальнае
  • Медыяправа
  • Карыснае
  • Накірункі працы і кампаніі
  • Агляды і маніторынгі
  • Рэкамендацыі па бяспецы калег

    КПЧ ААН прызнаў, што Беларусь парушыла правы журналісткі падчас затрымання

    Камітэт па правах чалавека ААН разглядзеў і прыняў рашэнне па скарзе сябра Беларускай асацыяцыі журналістаў Любові Праневіч.

    Справа тычылася затрымання журналісткі ў 2007 годзе.

    19 жніўня 2007 года журналістка Любоў Праневіч прысутнічала на сустрэчы з публіцыстам і палітыкам Паўлам Севярынцам. Аўтар прыйшла на прэзентацыю кнігі палітыка, каб узяць інтэрв’ю ў Паўла Севярынца і напісаць артыкул для часопіса Беларускай асацыяцыі журналістаў “Абажур”, гаворыцца ў паведамленні КПЧ ААН.

    У памяшканне ўварваліся супрацоўнікі міліцыі і спынілі сустрэчу, а затым затрымалі 28 чалавек, у тым ліку Любоў Праневіч. Яе даставілі ў аддзел унутраных спраў. Там спадарыня Любоў патлумачыла, што яна журналіст, паказала свой пашпарт і журналісцкае пасведчанне. Далей у дачыненні да яе быў складзены адміністрацыйны пратакол.

    Журналістцы было прад’яўленае абвінавачванне ў здзяйсненні адміністрацыйнага правапарушэння, прадугледжанага часткай 1 артыкула 23.34 Кодэкса аб адміністрацыйных правапарушэннях (парушэнне вызначанага парадку арганізацыі або правядзення мерапрыемства).

    Адзначым, што прэзентацыя кнігі Паўла Севярнца праходзіла ў офісе брэсцкай арганізацыі Партыі БНФ. За ўдзел у той жа прэзентацыі былі пакараныя яшчэ два сябры БАЖ — пазаштатная карэспандэнтка газеты «Брестский курьер» Настасся Мялешка, якая атрымала папярэджанне, і Яўген Бяласін, якога аштрафавалі.

    У верасні 2007 года адміністрацыйная справа супраць Любові Праневіч была разгледжана Маскоўскім раённым судом Брэста, які прызнаў журналістку вінаватай і вынес папярэджанне. Рашэнне суда Любоў спрабавала абскардзіць у вышэйстаячых беларускіх структурах, але яно было пакінутае ў сіле.

    У сваім звароце ў Камітэт пра правах чалавека ААН журналістка адзначала, што яе затрыманне было незаконным. Яна спасылалася на артыкул 39 Закона аб сродках масавай інфармацыі, у адпаведнасці з якім журналіст мае права прысутнічаць і пісаць аб любых падзеях, якія маюць сацыяльнае значэнне, у мэтах выканання сваіх прафесійных абавязкаў.

    У сваім рашэнні Камітэт па правах чалавека ААН адзначае, што звярнуўся ў гэтай справе да Беларусі, але нават не атрымаў адказу.

    Камітэт у сваім рашэнні адзначае, што “чалавек не павінен быць адвольна затрыманы з‑за ажыццяўлення свайго права на свабоду выказвання, у тым ліку свабоду шукаць, атрымліваць і распаўсюджваць інфармацыю. Адпаведна, ва ўмовах, апісаных вышэй, і пры адсутнасці якога-небудзь далейшага тлумачэння з боку дзяржавы, Камітэт лічыць, што правы аўтара былі парушаныя згодна з артыкулам 9 Міжнароднага пакта аб грамадзянскіх і палітычных правах.

    Разгледзеўшы ўсе прадстаўленыя доказы, КПЧ ААН прыйшоў да высновы, што агучаныя факты сведчаць аб парушэнні дзяржаўнымі органамі Беларусі правоў журналісткі.

    Самыя важныя навіны і матэрыялы ў нашым Тэлеграм-канале — падпісвайцеся!
    @bajmedia
    Найбольш чытанае
    Кожны чацвер мы дасылаем на электронную пошту магчымасці (гранты, вакансіі, конкурсы, стыпендыі), анонсы мерапрыемстваў (лекцыі, дыскусіі, прэзентацыі), а таксама самыя важныя навіны і тэндэнцыі ў свеце медыя.
    Падпісваючыся на рассылку, вы згаджаецеся з Палітыкай канфідэнцыйнасці