Папаўненне «экстрэмісцкага спісу» Мінінфарма: шэраг украінскіх інтэрнэт-рэсурсаў, акаўнт Франака Вячоркі, «Вечерний Жлобин»

Міністэрства інфармацыі Беларусі 6 жніўня папоўніла Рэспубліканскі спіс экстрэмісцкіх матэрыялаў. У пералік забароненых дададзеныя шэраг украінскіх інфармацыйных інтэрнэт-рэсурсаў, акаўнт Франака Вячоркі ў «ВКонтакте», Telegram-суполка «Вечерний Жлобин».

Выява створана БАЖ з выкарыстаннем Chat­G­PT

«Экстрэмісцкай інфармацыйнай прадукцыяй» прызнаны YouTube-канал «УНІАН» з ідэнтыфікатарам youtube.com/@unian.

У «экстрэмісцкі спіс» Мінінфарма відэаканал украінскага інфармагенцтва  трапіў паводле рашэння суда Жлобінскага раёна Гомельскай вобласці ад 1 жніўня 2024 года.

«Экстрэмісцкімі» прызнаныя таксама два рэгіянальныя ўкраінскія інфармацыйныя Telegram-каналы. Гэта «Киевский Движ» (ідэнтыфікатар t.me/k_dvizh)  і «Мiй Киïв | Свiтло» (ідэнтыфікатар t.me/kiev_novosti). Адпаведнае рашэнне датычна абодвух прыняў 30 ліпеня суд Клецкага раёна Мінскай вобласці.

Рашэннем суда Бярозаўскага раёна Брэсцкай вобласці ад 31 ліпеня  «экстрэмісцкай інфармацыйнай прадукцыяй» абвешчаны акаўнт «Франак Вячорка» ў сацыяльнай сетцы «ВКонтакте» (ідэнтыфікатар vk.com/franak).

Гэтаксама 31 ліпеня рашэннем Жлобінскага суда Гомельскай вобласці  «экстрэмісцкай інфармацыйнай прадукцыяй» прызнаная Telegram-суполка «Вечерний Жлобин» з ідэнтыфікатарам t.me/jlob_in. У групе публікуюцца мясцовыя навіны, аб’явы і звесткі пра гучныя падзеі з усёй Беларусі.