З’явіўся новы падкаст пра беларускую фатаграфію «Адным кадрам»

Праект Беларуская фатаграфічная платформа запусціў падкаст «Адным кадрам». Ужо выйшаў першы эпізод.

Першы выпуск «Адным кадрам» прысвечаны фатаграфіі Сяргея Брушко з зоны адчужанасці. Гэта размова пра чалавечую драму Чарнобыля вачыма выбітнага беларускага фатографа.

Вядзе падкаст куратарка, фатографка і журналістка Юля Ружчака. Госць першага эпізоду – фатограф і сын Сяргея Брушко Зміцер Брушко. 

Фота, пра якое ідзе гаворка, было зроблена ў 1993 годзе ў зоне адсялення. На ім — жыхары пасёлка, якія пакідаюць свае дамы. Людзі развітваюцца з разуменнем, што, хутчэй за ўсё, больш ніколі не ўбачацца.

Па словах Зміцера, людзі з фота і праўда больш ніколі не бачыліся.

«З гэтага моманту для гэтых людзей пачалося іншае жыццё, якое яны не выбіралі, —цытуе Брушко CityDog.io. — Проста чалавек гуляў з прыродай, стварыў машыну, якая ўзарвалася, і тысячы людзей вымушаны былі перасяліцца і пакінуць свае дамы».

У падкасце суразмоўцы абмяркоўваюць свае ўражанні ад фота: якое яно на смак, запах, гучанне.  «Адна нота, якая залазіць да цябе ў галаву і нацягвае нервы», — кажа Зміцер.

«Калі глядзіш на фатаграфію без кантэксту, то здаецца, што ўсё вельмі проста: два мужыкі цалуюцца. Але калі глядзець праз гісторыю, праз разуменне, што такое Чарнобыль, праз зыходную кропку, дзе людзі губляюць радзіму, то ўсё выглядае зусім па-іншаму. І калі паставіць сябе на месца гэтых людзей, то робіцца балюча».

Паслухаць падкаст можна на асноўных платформах – Apple Pod­casts, Spo­ti­fy і YouTube

Слом эпох: фотографии Сергея Брушко о 1980–1990‑х годах в Беларуси