Скаргу Вольгі Крапоцінай зарэгістравалі ў Камiтэце па правах чалавека
19 студзеня 2016
Скаргу гродзенскай грамадскай актывісткі Вольгі Крапоцінай зарэгістраваў Камiтэт па правах чалавека (КПЧ) ААН. Дзяўчыну ў верасні 2014 года затрымалі ў Гродне за раздачу ўлётак “Вярніце Крым! Рукі прэч ад Украіны!”, а ў яе кватэры правялі ператрус.
«Прадукцыя СМІ», за якую затрымалі Вольгу Крапоціну
У лістападзе суддзя Ленінскага раённага суда Дзмітрый Бубенчык аштрафаваў яе на 30 базавых велічыняў па абвінавачанні ў “незаконным вырабе і распаўсюдзе прадукцыі СМІ” (арт. 22.9 КаАП). Экспертыза ўлётак, якую рабіла Міністэрства інфармацыі, паказала, што яны “носяць масава-палітычны характар”.
Абскардзіць рашэнне суда Вользе Крапоцінай не ўдалося.
Ліст з КПЧ ААН
Дзяўчына вырашыла дамагчыся справядлівасці ў міжнародных інстанцыях, бо прайшла ўсе беларускія судовыя працэдуры. Па яе словах, яна не чакала так хутка атрымаць адказ з КПЧ.
- За год мае дакументы прынялі і зарэгістравалі. Маю спадзеў, што хаця б міжнародная арганізацыя прызнае несправядлівасць выстаўленых мне абвінавачанняў.
Раздачу ўлётак суд палічыў “парушэннем закона аб СМІ”
Вольга Крапоціна
@bajmedia
