• Актуальнае
  • Медыяправа
  • Карыснае
  • Накірункі працы і кампаніі
  • Агляды і маніторынгі
  • Рэкамендацыі па бяспецы калег

    Усход – справа тонкая… Але цікавая

    Дагестан, Чачэнская рэспубліка, Паўночная Асеція… Тры каўказскія рэгіёны, якія трапляюць у зводкі навінаў часцей за іншыя. Добрыя весткі адтуль прыходзяць вельмі рэдка, а вось выбухі, забойствы і іншыя злачынствы — для гэтых мясцін справа калі не паўсядзённая, то не выключная.

    У Дагестан я трапіла па запрашэнні Расійскага саюзу журналістаў (СЖР) і Саюзу журналістаў Дагестана. У Махачкале праходзіла першая сустрэча маладых лідэраў арганізацый трох суседніх рэгіёнаў. Запрасілі падзяліцца вопытам аналагічнай дзейнасці БАЖ.

    Пазбавіцца адчування небяспекі ў Махачкале, дзе адбылася сустрэча журналістаў, так і не атрымалася. Горы, мора, сонца, салодкія дыні і іншыя прыкметы мірнага жыцця — нібыта на месцы, але гатэль, да прыкладу, ахоўваюць аўтаматчыкі. Побач з брамай, між раскідзістых дрэваў — блок-пост, збудаваны з мяхоў з пяском.

    Назвы мясцовых гарадоў для вуха гучаць зусім не лагодна: Каспійск — сумнавядомы тэрактам на 9 мая 2002 года, калі падчас параду загінулі і пацярпелі дзясяткі мірных жыхароў, ён жа — месца, дзе на цагляных заводах трапляюць у рабства сотні людзей з розных краін былога Саюзу. Буйнакс, Махачкала…

    Куды трапіла, канчаткова разумею, калі разам з маладымі журналістамі рэгіёну абмяркоўваем, якія б акцыі і кампаніі яны маглі зладзіць у найбліжэйшай перспектыве. Зразумела, акцыі павінны быць скіраваныя на рашэнне мясцовых праблем.

    «Штогод у кране дзесяткі людзей гінуць на супрацьпяхотных мінах, сотні чалавек застаюцца калекамі, і ўсё таму, што да сёння не вырашана праблема іх абясшкоджання, — дзеліцца сваім болем чачэнец Саід. — Маўляў, няма такога досведу ў вайскоўцаў, тэхналогію трэба распрацоўваць. Хоць тыя ж вайскоўцы едуць на Балканы і там з поспехам вырашаюць гэткія ж задачы».

    «А сярод нашай дагестанскай моладзі ўсё больш распаўсюджваюцца экстрэмісцкія ідэі. Калі зараз не возьмемся за гэтую праблему, не знойдзем яе карані, заўтра яшчэ ў горшай сітуацыі будзем», — кажа Зульфія.

    Семінар вядзем разам з маладым дарадцам старшыні СЖР Раманам Сярэбраным. Ловім разгубленыя погляды адзін аднаго. Да такога не былі падрыхтаваныя. Абарона гістарычных помнікаў — знаёма. Прыцягненне ўвагі да стану навакольнага асяроддзя — калі ласка. Журналісцкія акцыі салідарнасці — з гэтым дапаможам. А вось складанне карт мінных палёў, барацьба з тэрарызмам і экстрэмісцкімі думкамі ў галавах маладзёнаў… Выбіраем за лепшае слухаць…

    Тое, што чуем, спараджае ў галаве толькі адну думку: «Усход — справа тонкая». Нават дзіўная. І журналісту з іншай краіны, з іншай культуры працаваць у гэтых мясцінах будзе вельмі нялёгка. Бо побач з дэмакратычнымі каштоўнасцямі і сякімі-такімі прафесійнымі стандартамі (хоць і з савецкіх часоў) дзіўным чынам суіснуюць мясцовыя правілы і звычкі, якія не маюць ніякага дачынення да правоў і свабодаў асобы.

    Узяць, да прыкладу, нашэнне хустак. Саід жыве і працуе ў Грозным. Аднойчы яго газета змясціла на сваіх старонках артыкул пра наведванне горада дэлегацыяй з еўрапейскай краіны. Апублікавалі фотаздымак, на якім сярод іншых была і жанчына — удзельніца той дэлегацыі. Зразумела, хусткі на галаве ў яе не было. У такім выглядзе газету проста забаранілі друкаваць, і давялося тэрмінова ў фоташопе дамалёўваць еўрапейцы гэты галаўны ўбор.

    «Традыцыя, — тлумачыць Саід. — У Рамзана жонка хустку носіць, дык чаму іншыя не павінны?»

    Усход — справа тонкая…

    Як працаваць з маладымі лідэрамі? БАЖ падзяліўся досведам з Саюзам журналістаў Расіі

    Самыя важныя навіны і матэрыялы ў нашым Тэлеграм-канале — падпісвайцеся!
    @bajmedia
    Найбольш чытанае
    Акцэнты

    Телеграм‑бот «Глаз бога» и «Магнит». Как милиционеры пробивают телефонные номера, почты и адреса беларусов

    07.09.2023
    Акцэнты

    Какую информацию о нас хранят телеграм‑боты, чем они опасны и как удалить их из аккаунта? Отвечают эксперты

    21.08.2023
    Акцэнты

    30-годдзе за кратамі — сёння ў зняволенай журналісткі Кацярыны Андрэевай дзень народзінаў

    Кацярына Андрэева мусіла сустрэць «круглую» дату на волі — 5 верасня 2022 года сканчаўся яе несправядлівы тэрмін у калоніі. Але не. 7 красавіка 2022-га сям’і палітзняволенай журналісткі стала вядома, што ёй выставілі новае абвінавачанне. 13 ліпеня 2022 года Кацярыну прызналі вінаватай «у выдачы замежнай дзяржаве, міжнароднай альбо замежнай арганізацыі ці іх прадстаўніку дзяржаўных сакрэтаў Рэспублікі Беларусь». Суддзя Гомельскага абласнога суда Алег Харошка прызначыў ёй яшчэ 8 год пазбаўлення волі.
    02.11.2023
    Кожны чацвер мы дасылаем на электронную пошту магчымасці (гранты, вакансіі, конкурсы, стыпендыі), анонсы мерапрыемстваў (лекцыі, дыскусіі, прэзентацыі), а таксама самыя важныя навіны і тэндэнцыі ў свеце медыя.
    Падпісваючыся на рассылку, вы згаджаецеся з Палітыкай канфідэнцыйнасці