Ва Уроцлаве адкрылася выстава беларускай фатографкі

Праект BETONIUM Кацярыны Кузьмічовай — гэта пошук сучаснай ідэнтычнасці былых сацыялістычных краін у кантэксце архітэктурнай спадчыны —  жылых панэльных дамоў. Паглядзець на незвычайныя працы можна да 15 верасня.

Фота: katerinakouzmitcheva.com

Выстава працуе ва Ўроцлаве ў Галерэі сучаснага мастацтва MD_S, піша тэлеграм-канал «Белорусская фотография».

Праект беларускай фатографкі даследуе ідэнтычнасць ва ўмовах розных ідэалагічных сістэм і гарадской палітыкі. Аўтарка спрабуе зразумець і ўласны досвед жыцця ў адной з савецкіх рэспублік.

«Людзі жывуць у дамах, створаных яшчэ ў савецкі час, але іх светапогляд і светапоглядны складнік фарміруюцца ўжо ў іншым, чым сацыялістычным, асяроддзі. У гэтай сітуацыі яны фарміруюць новыя гарадскія рытуалы, практыкі і сэнсы».

Здымкі для праекта вяліся ў розных краінах былой «жалезнай заслоны», у тым ліку ў Польшчы, Славакіі, Германіі, Грузіі, Беларусі, Славеніі, Літве.

Кацярына Кузьмічова — беларуская фатографка, зараз жыве ва Ўроцлаве. Працуе на стыку дакументальнай і мастацкай фатаграфіі. У сваіх праектах яна даследуе тэмы ўзаемадзеяння людзей і палітычных сістэм, канструктыўнай памяці ідэнтычнасці, праблемы жаночых гендэрных роляў. 

Выпускніца Санкт-Пецярбургскай Акадэміі дакументальнай і мастацкай фатаграфіі «Фатаграфіка», Акадэміі прыгожых мастацтваў ва Ўроцлаве, а таксама стыпендыят праграмы Gaude Polo­nia Міністэрства культуры і нацыянальнай спадчыны, член Міжнароднай асацыяцыі фотажурналістаў WOMEN PHOTOGRAPH. Пераможца міжнародных фотаконкурсаў TIFA і BIFA. Яе працы публікаваліся, у часопісах «Bird in Flight», «Mono­vi­sions» і «Dod­ho».

Фота: katerinakouzmitcheva.com