Журналіст Дзяніс Івашын з’яўляецца падазраваным па крымінальнай справе

Дзяніса Івашына затрымалі 12 сакавіка прыкладна а 18-ай гадзіне, паводле відавочцаў, у кватэры, дзе ён пражывае. Перад гэтым да дома пад’ехаў сіні мікрааўтобус.

Да позняй ночы ў кватэры журналіста сілавікі праводзілі ператрус. Таксама ў той вечар вобшук зрабілі дома ў маці Дзяніса, а 15 сакавіка прыйшлі з вобшукам да яго 95-гадовай бабулі.

— У хаце і на лецішчы правялі ператрусы, вымалі ўсе носьбіты інфармацыі: тэлефоны, ноўтбукі, камп’ютары, сім-карты, банкаўскія карткі, кнігі, нататнікі, запісы, грошы ды розную драбязу кшталту сцяжкоў, значкаў, візітак ды інш. Вельмі цікавіла ўсе, звязанае з Украінай, хоць у пастанове на ператрус згадваецца крымінальны артыкул нібыта за распаўсюд асабістай інфармацыі. Зараз Дзяніс знаходзіцца ў турме № 1 Гродна, — паведаміла жонка журналіста Вольга Івашына.

Дзяніса змясцілі ў следчы ізалятар.

Дзяніс Івашын займаецца расследаваннямі. У Беларусі супрацоўнічае з рэдакцыяй газеты «Новы Час». Апошні яго матэрыял для «Новага Часу» быў пра тое, як былыя ўкраінскія «беркутаўцы» паспяхова ўладкаваліся на службу ў беларускую міліцыю.

Таксама ён з’яўляецца журналістам і  рэдактарам беларускай службы сайта «ІнформНапалм».

На сёння   ў зняволенні знаходзяцца 11 беларускіх журналістаў (Сяргей Гардзіевіч, журналіст «Першага рэгіёна», пад хатнім арыштам).

ГА «БАЖ» патрабуе неадкладнага вызвалення Дзяніса Івашына і ўсіх журналістаў!