Журналістак Кацярыну Андрэеву і Дар’ю Чульцову пакаралі 7 суткамі арышту

Паводле пратакола, Кацярыну Андрэеву затрымлівалі 15 лістапада на вуліцы, яна прымала ўдзел у несанкцыянаваным масавым мерапрыемстве, хаця яна з 12 да 17–30 знаходзілася ў кватэры на Смарогскім тракце на 14 паверсе, што пацвердзіў на судзе сведка — гаспадар кватэры Дзмітрый, паведамляе «Белсат».

Журналістка не змагла да суда нават азнаёміцца з пратаколам.

Вінаватай сябе не прызнала і абвінаваціла міліцыянтаў, што складалі пратакол, у ілжэсведчанні.

У судзе Кацярына расказала, што яе затрымлівалі ў кватэры, дзверы выламалі, забеглі каля 10 спецназаўцаў. Яны не тлумачылі нічога, проста сказалі, каб збіраліся і ішлі з імі. Гвалту падчас затрымання не было.

У РУУС Кацярыне стала блага: яна адчула боль ў галаве, званітавала, страціла прытомнасць. Выклікалі хуткую, даставілі пад канвоем у 9‑ю лякарню. Нічога сур’ёзнага не знайшлі, але прапісалі пасцельны рэжым, поўны спакой і абавязковы візіт да неўролага на наступны дзень.

Раніцай 16 лістапада яе забралі ў РУУС, а адтуль даставілі ў ЦІП.

Дар’ю Чульцову затрымлівалі разам з Андрэевай. Пакаранне ў яе аналагічнае — 7 сутак арышту.