У Беларусі заблакаваны доступ да рэгіянальных сайтаў

Першыя скаргі ад чытачоў аб немагчымасці адкрыць сайт «Народныя навіны Віцебска» з’явіліся днём 29 кастрычніка. Яны паступалі ад карыстальнікаў «Белтэлекама», пазней «Народныя навіны Віцебска» сталі недаступнымі і ў іншых беларускіх правайдэраў.

Заблакаваны таксама доступ да сайта «Флагшток». Гэта рэгіянальны сайт, які піша пра навіны Гомеля і Гомельскай вобласці. Але сайт адкрываецца з‑за мяжы і праз VPN.

Замест названых сайтаў у наведвальнікаў з Беларусі адкрываецца «заглушка» з тэкстам аб тым, што доступ да інфармацыйных  рэсурсаў абмежаваны на падставе рашэння Мінінфарма.

Сайт «Народныя навіны Віцебска» працуе больш за 15 гадоў: яго стварыла група віцебскіх журналістаў у 2006 годзе.  Сайту «Флагшток» толькі некалькі год, гэта малады медыяпраект.

У кастрычніку былі заблакаваныя ў Беларусі сайты Telegraf.by, газеты «Новы час», расейскіх медыя «Reg­num» і «Настоящее время», нямецкага «Deutsche Welle».