У Варшаве пакажуць спектакль пра журналіста, прататыпам якога стаў галоўны рэдактар MOST

У Варшаве пакажуць спектакль «Апошнi сведка» — гісторыю журналіста, прататыпам якога стаў галоўны рэдактар MOST Руслан Кулевіч. Пастаноўка адбудзецца 7 лютага на сцэне Teatr Powszech­ny.

Сцэна са спектакля «Апошнi сведак». Фота: Alexan­dra Kononchenko

П’еса заснаваная на гісторыях затрыманняў журналістаў у 2020 годзе. Яе герой Руслан кожны дзень едзе на ровары па вуліцах Гродна, збіраючы навіны. Ён таксама запісвае гісторыі мінулага свайго горада і яго жыхароў.

Але калі Гродна становіцца адным з цэнтраў беларускіх пратэстаў падчас прэзідэнцкіх выбараў у жніўні 2020 года, Руслан становіцца мішэнню пераследу. Раптам мяжа паміж праўдай і ілюзіяй размываецца. Калі сістэма яго ідэалаў разбураецца, ён бачыць выразныя паралелі паміж трывогамі сучаснасці і падзеямі мінулага. Адначасова журналіст даследуе каштоўнасці, якія фармуюць нацыянальную ідэнтычнасць беларусаў.

Руслан Кулевіч кажа, што яго біяграфія — толькі частка вобраза галоўнага героя. Ён запісваў гісторыі жыхароў Гродна і ўжо ў вымушанай эміграцыі выдаў пра іх кнігу «Апошнія сведкі Гродна». Аднак многія павароты сюжэту і дэталі з’яўляюцца прыдумкай або творчым асэнсаваннем аўтараў спектакля.

Тэкст напісала Амалія Рызніч. У спектаклі задзейнічаны Міця Савелаў, які здымаўся ў «Кароне» (Net­flix) і «Задачы трох цел» (Net­flix).

Сцэнічная чытка спектакля «Апошнi сведка» (The Last Wit­ness) упершыню была паказана ў лістападзе 2024 года ў Max­im Gor­ki The­ater у Берліне.

Пасля спектакля ў Варшаве адбудзецца дыскусія на тэму «Перспектывы змен у Беларусі: 2026 год» з удзелам беларускіх і міжнародных экспертаў. Спектакль ідзе на англійскай, рускай i беларускай мовах з англійскімі субцітрамі, дыскусія пройдзе на англійскай мове.

«Нас называлі праклятым народам». Руслан Кулевіч пра апошнюю кнігу ўспамінаў сталых гродзенцаў і параўнанне іх лёсаў з нашым