Для Ларысы Шчыраковай адкрылі збор на BYSOL

Былой палітзняволенай журналістцы патрэбна дапамога. Зараз яна чакае ў Польшчы міжнародную абарону, але праз Дублінскае пагадненне яе справа зацягнулася.

Ларыса Шчыракова са сваім партрэтам, які быў створаны ў межах выставы БАЖ «Журналісты: бязгучны рэжым». Вільня, 16 верасня 2025 года. Фота: БАЖ

Да 2020 года Ларыса была карэспандэнткай «Белсата» ў Гомелі. Пасля таго, як пратэсты скончыліся, а рэпрэсіі ўзмацніліся, у 2021 годзе для сваёй бяспекі яна сышла з прафесіі і занялася этнафатаграфіяй. Нягледзячы на гэта, у 2023 годзе яе асудзілі па двух крымінальных артыкулах і прысудзілі да трох з паловай гадоў калоніі.

У верасні 2025 года ў складзе групы з 52 палітзняволеных журналістку прымусова вывезлі з Беларусі ў Літву – за тры месяцы да афіцыйнага канца тэрміну.

Апынуўшыся ў выгнанні, Ларыса Шчыракова вырашыла пераехаць у Польшчу, бо ведае польскую мову і мае там знаёмых. Цяпер Ларыса жыве ў Беластоку і чакае рашэння па сваёй справе аб міжнароднай абароне – яна патрапіла пад Дублінскую працэдуру і рызыкуе быць дэпартаванай назад у Літву.

Праз зацягнутую працэдуру па Дубліне ў Ларысы няма магчымасці ўладкавацца на афіцыйную працу. Пасля вызвалення яна жыла ў шэлтэры, а зараз ёй трэба здымаць жыллё. Каб неяк пражыць, яна можа зарабляць фотаздымкамі, але гэта таксама патрабуе фінансавых укладанняў у тэхніку, пошук заказаў і навучанне.

Сума збору для Ларысы Шчыраковай — 3 000 еўра:

• 1200 еўра — арэнда жылля на бліжэйшыя тры месяцы;
• 800 еўра — тэхніка і абсталяванне для этнафотасесій;
• 600 еўра — юрыдычнае суправаджэнне па справе (Дублінская працэдура) і паслугі перакладчыка;
• 400 еўра — базавыя патрэбы.

Дапамагчы можна ПА СПАСЫЛЦЫ

Журналістка Ларыса Шчыракова даказвае, што мае права на разгляд справы аб міжнароднай абароне ў Польшчы, бо працавала на польскі тэлеканал