Адкрыццё выставы «Маладосць. Беларусь». ФОТАРЭПАРТАЖ

Глядзець фотапраект «Маладосць. Беларусь»

Падчас адкрыцця выставы ў Прэс-клубе Беларусь (вул. Веры Харужай, 3, Мінск) куратар курса ў Беларусі вядомы фатограф Сяргей Балай сказаў, што задаволены вынікам: «Адна з мэтаў курса была «не пакласці працы ў стол».  Мы не ўключалі «дыктатара». І чым больш мы праводзілі часу разам, тым лепшы вынік атрымліваўся. І атрымалася ў нас сапраўды «па-маладому». Ведаю, што многія праекты былі апублікаваныя ў медыя, многія працягваюцца. Я вельмі задаволены вынікам».

Адна з куратараў курса Марына Загорская адзначыла, што сёлета ў праграме было новаўвядзенне — фатографаў вучылі прасоўваць свае працы на медыйным рынку.

«Мы ладзілі шмат фотакурсаў, але не задумваліся як далей прасоўваць вынік працы, вынік навучання. Гэтым разам мы зрабілі вялікі крок наперад дзякуючы нашым трэнерам, якія распавялі, як і дзе можна шукаць падтрымку сваім задумам. Некаторыя нашы «птушаняты» вылецелі з «гнязда» і не могуць прысутнічаць тут, бо паехалі ў іншыя краіны па працоўных справах. Спадзяюся, калі аднойчы вы будзеце атрымліваць прэміі ў прэстыжных прафесійных конкурсах, то згадаеце пра гэты адукацыйны курс і запросіце нас на вечарынку», — з жартам заўважыла спадарыня Марына.

Нагадаем, што фотавыстава “Маладосць. Беларусь” упершыню была прэзентаваная ў лютым 2017 года ў Літаратурным музеі Петруся Броўкі. На экспазіцыі былі прадстаўлены лепшыя фотапраекты выпускнікоў адукацыйнага курса “Фотапраект: ад ідэі да прасоўвання”. “Маладосць. Беларусь” — гэта фотагісторыі пра маладых беларусаў, іх жыццё, захапленні і асяродак.

Куратары курса Міхаіл Дамажылаў (Санкт-Пецярбург), Сяргей Балай (Мінск), Сяргей Страіцелеў (Санкт-Пецярбург).

Фота з адкрыцця выставы Таццяны Ткачовай