«Рэпарцёры без межаў» занепакоены станам журналіста Кірыла Пазняка

Міжнародная арганізацыя «Рэпарцёры без межаў» (RSF) выказала глыбокую занепакоенасць станам здароўня палітзняволенага журналіста Кірыла Пазняка і заклікала беларускія ўлады забяспечыць яму медыцынскую дапамогу.

Кірыл Пазняк. Скрыншот відэа

«RSF глыбока занепакоеная станам здароўя журналіста Кірыла Пазняка, шпіталізаванага ў цяжкім стане пасля больш чым 8 месяцаў зняволення. Улады павінны неадкладна забяспечыць яму доступ да належнай медыцынскай дапамогі і спыніць рэпрэсіі супраць журналістаў», — гаворыцца ў паведамленні.

Нагадаем, 22 траўня стала вядома, што Кірыл Пазняк патрапіў у турэмны шпіталь у цяжкім стане. Былая жонка журналіста Алена Пакала паведаміла, што ён церпіць ад наступстваў пнеўманіі і кавіду, які паренёс у ізалятары на Акрэсціна. Паводле яе, Кірыл Пазняк перыядычна траціць прытомнасць, мае праблемы з лёгкімі і дыханнем.

Справа Кірыла Пазняка і яго дачкі Яніны Пазняк

Кірыла Пазняка і яго дачку Яніну Пазняк затрымалі 3 верасня 2025 года. Іх вінавацяць паводле двух крымінальных артыкулаў: 361–1 КК — «Стварэнне экстрэмісцкага фармавання альбо ўдзел у ім» і 369–1 «Дыскрэдытацыя Рэспублікі Беларусь».

4 верасня, YouTube-канал «Платформа 375» быў  абвешчаны «экстрэмісцкім фармаваннем», Кірыл Пазняк быў названы датычным да гэтага рэсурсу.

Рашэнне прызнаць «Платформу 375» «экстрэмісцкім фармаваннем» прыняў Камітэт дзяржбяспекі Беларусі. З таго ж дня рашэнне набыло моц.

У «Пераліку арганізацый, фармаванняў, індывідуальных прадпрымальнікаў, якія маюць дачыненне да экстрэмісцкай дзейнасці» на сайце МУС Беларусі інфармацыя пра канал з’явілася 11 верасня.

YouTube-канал «Платформа 375» быў зарэгістраваны ў красавіку 2021 года. У 2021–2022 гадах канал правёў некалькі дэбатаў паміж праўладнымі прапагандыстамі і іх апанентамі, якія вымушана з’ехалі з краіны. Апошні эфір адбыўся 3 снежня 2022 года з удзелам Рыгора Азаронка (СТБ), Юрыя Цераха («СБ. Беларусь сегодня») — у Мінску, а таксама Алега Талерчыка (сузаснавальнік арганізацыі былых супрацоўнікаў сілавых структур ByPol) і Дзяніса Дудзінскага (тэлевядоўца, шоўмэн) — у Варшаве.

17 верасня 2025 года праваабарончая супольнасць прызнала журналіста Кірыла Пазняка палітычным зняволеным. 23 студзеня 2026 года праваабарончая супольнасць Беларусі заявіла аб прызнанні палітычнай зняволенай дачкі журналіста Яніны Пазняк.