14 ліпеня ў Лоеўскім раённым судзе павінны былі разглядацца адміністрацыйныя пратаколы, складзеныя мясцовай міліцыяй у дачыненні да гомельскага журналіста-фрылансера Кастуся Жукоўскага.
“Суд прызначылі на 10 гадзін, – кажа фрылансер. – Раніцай я патэлефанаваў у Лоеў і папярэдзіў, што прыехаць не змагу, паколькі параніў нагу і накіроўваюся да лекара. Прасіў перанесці разгляд справаў хаця б на тыдзень. Да таго ж міліцэйскія чыноўнікі і аддзел Следчага камітэта не адказалі яшчэ на мае звароты адносна ўчыненага нада мною гвалту ў РАУС падчас затрымання”.
У чэрвені, пасля відэаздымкаў Лоеўскага камбінату будаўнічых матэрыялаў і затрымання міліцыяй, Жукоўскі атрымаў копіі адразу чатырох адміністрацыйных пратаколаў. Два з іх – нібыта за абразу кіраўніцы спраў Лоеўскага райвыканкаму Ірыны Пастуховай і намесніцы старшыні райвыканкаму па ідэалогіі Наталлі Кауравай, а затым – першага намесніка начальніка РАУС Генадзя Маджары.
Трэці пратакол – нібыта за непадпарадкаванне таму ж Маджару, чацвёрты – нібыта за ўчыненае дробнае хуліганства. Як пазначана ў пратаколе, Жукоўскі “парушыў дзейнасць арганізацыі РАУС, моцна крычаў і сваімі дзеяннямі выказваў яўную непавагу грамадству”.
Кастусь Жукоўскі разам з Аляксеем Атрошчанкам 21 чэрвеня здымалі ў Лоеве відэасюжэт пра гаротны стан мясцовых прадпрыемстваў. На відэа ёсць размова з чыноўніцамі райвыканкама, якія, відавочна, і выклікалі міліцыянтаў з мэтай спыніць відэаздымкі.
Спачатку на месца прыбылі двое супрацоўнікаў ДАІ, а неўзабавае – яшчэ трое, уключна з начальнікам РАУС Уладзімірам Бухаўцовым.
У міліцыі фрылансераў трымалі амаль шэсць гадзін, але ніякіх пратаколаў не складалі. Паводле слоў Жукоўскага, з яго асабіста здзекаваліся, ужываючы сілу. Пра гэта журналіст напісаў у кнізе заўваг і прапаноў РАУС, а таксама ў заяве раённаму аддзелу Следчага камітэту.
Вярнуўшыся ў Гомель, Жукоўскі зняў пабоі і падаў таксама скаргу начальніку абласнога УУС на дзеянні лоеўскіх міліцыянтаў.
Праз тыдзень пасля інцыдэнту з Лоева на гомельскі адрас Кастуся Жукоўскага прыйшлі чатыры копіі адміністрацыйных пратаколаў.
Калега Жукоўскага Аляксей Атрошчанка атрымаў з лоеўскай міліцыі два пратаколы. Вінавацяць Аляксея ў абразе на адрас службовых асоб дзяржаўнага органа і непадпарадкаванні законным патрабаванням міліцыянта Уладзіміра Бухаўцова. Дату суда Аляксей Атрошчанка пакуль не ведае. Усе шэсць пратаколаў на журналістаў складаў старшы ўчастковы інспектар, маёр міліцыі Андрэй Хічоў.