У «Белсата» хочуць канфіскаваць рэшту тэхнікі, якой не адабралі раней

Любянчук накіраваў чарговую заяву ў Першамайскі РУУС адносна тэхнікі, вяртання якой не можа дамагчыся ўжо амаль год. 12 студзеня не дачакаўшыся афіцыйнага адказу, ён паехаў у аддзяленне міліцыі, каб даведацца пра лёс заявы.

Да аператара выйшаў оперупаўнаважаны Уладзіслаў Падрэз, які раней вёў справу Аляксандра Баразенкі. Пасля размовы міліцыянт патэлефанаваў і папрасіў Любенчука прыйсці да яго яшчэ раз у суботу 13 студзеня. Пры гэтым афіцыйнай позвы выпісана не было. У выніку Любянчук атрымаў пратакол за незаконнае выкарыстанне таварнага знаку на апаратуры «Белсата».

Паводле прадстаўніка «Белсата» ў Беларусі Аляксея Мінчонка, міліцыянты хочуць давесці справу да суду і канфіскаваць тую тэхніку, якая яшчэ не была канфіскаваная.

«Мне падаецца, супрацоўнікі Першамайскага раёну дзейнічаюць несамастойна. Яны маюць загад любымі сіламі не вяртаць нашую тэхніку і спрабуюць падвесці гэтае жаданне пад заканадаўства. І будуць спрабаваць сканфіскаваць тэхніку, якую суд яшчэ не канфіскаваў, але якая знаходзілася ў міліцыі пасля ператрусаў. Цяпер трэба чакаць прызначэнне даты суду. Гэта можа адбыцца цягам месяца. Мы не пакінем гэтую справу і будзем дамагацца вяртання тэхнікі», – кажа Аляксей Мінчонак.

Любянчука затрымалі 31 сакавіка падчас ператрусу ў адным з менскіх офісаў «Белсату». Аператара завезлі ў Першамайскі РУУС Менску, дзе на яго склалі пратакол за нецэнзурную лаянку (дробнае хуліганства, артыкул 17.1 Кодэксу аб адміністрацыйных правапарушэннях).

Фармальнаю прычынаю ператрусаў і канфіскацыяў стала нібыта незаконнае выкарыстанне «Белсатам» таварнага знаку.

Справа вакол таварнага знаку цягнецца не першы год

Яна сталася прадметам судовых разбіральніцтваў паміж тэлеканалам і ўладальнікам фірмы «БЕЛСАТплюс» Андрэем Беляковым. Паводле яго, СМІ, якое транслюе з тэрыторыі Польшчы, парушае ягоныя бізнесовыя інтарэсы. Сёлета ён склаў чарговую скаргу.