З ІЧУ нечакана адпусцілі віцебскага фатографа Ігара Мацьвеева

Ігар Мацьвееў  быў затрыманы 9‑га жніўня на плошчы Перамогі, калі здымаў, як людзей хапаў АМАП. З ім самім падчас  затрымання абыходзіліся  карэктна, кажа Ігар Мацьвееў. Але па змяшчэнні ў ІЧУ ён бачыў, што некаторых затрыманых збівалі, задавалі правакацыйныя пытанні, запалохвалі.

У ізалятары часовага ўтрымання Ігар Мацьвееў правёў  трое сутак.

Хаця спадзяваўся, што затрымаецца там не больш як на тры гадзіны і яшчэ паспее апублікаваць фотарэпартаж на сайце “Народныя навіны Віцебска”.  Ён распавёў, што на яго склалі пратакол паводле артыкула 17.1 КаАП — за дробнае хуліганства, хаця ніякіх хуліганскіх учынкаў не было. Падпісваць пратакол Ігар Мацьвееў адмовіўся, і нават яго не чытаў, бо не меў пры сабе акуляраў.

Чаму напярэдадні жонцы паведамілі, што яго арыштавалі на 10 сутак, застаецца невядомым. Верагодна, 9‑га жніўня  ў  ІЧУ быў дастаўлены іншы чалавек з такім самым прозвішчам і ініцыяламі, і яго насамрэч асудзілі. Дзіва, але падобная гісторыя адбылася і з прысудам затрыманаму журналісту Змітру Казакевічу. 11-га жніўня ягонай жонцы паведамілі, што яму прысуджаны арышт на 10 сутак, а калі яна назаўтра прывезла перадачу, то сказалі, што суда над мужам яшчэ не было,  і арыштам пакаралі нейкага іншага Казакевіча. Аднак у другой палове дня  дзяжурны паведаміў сваякам прозвішчы асуджаных за апошнія некалькі гадзінаў,  і ў спісе зноўку быў Зміцер Казакевіч з ранейшым  выракам – 10 сутак арышту.

Што да  Ігара Мацьвеева, то яму  сказалі чакаць позву на суд бліжэйшымі днямі.

Фота Алега Клімовіча