«Экстрэмісцкі» спіс Мінінфарма: сацсеткі 73-гадовай блогеркі, TikTok-акаўнт «belarusnovosti1» і сайт «Честные люди»

Міністэрства інфармацыі Беларусі 20 траўня ў чарговы раз папоўніла Рэспубліканскі спіс экстрэмісцкіх матэрыялаў.

Аляксандра Ханевіч. Фота: з асабістага архіва

Паводле рашэння суда Ленінскага раёна Гродна ад 16 траўня 2025 года ў яго ўключылі асабістыя інтэрнэт-старонкі 73-гадовай блогеркі Аляксандры Ханевіч, якая цяпер знаходзіцца ў вымушанай эміграцыі. «Экстрэмісцкай інфармацыйнай прадукцыяй» прызнаныя Insta­gram-акаўнт «Ali­ak­san­dra Khanevich | в 70 снялась у Юрия Дудя» (ідэнтыфікатар instagram.com/aliaksandrakhanevich),

Face­book-акаўнт «Ali­ak­san­dra Khanevich» (ідэнтыфікатар facebook.com/aliaksandra.khanevich ), YouTube-каналы  «АЛЕКСАНДРА ХАНЕВИЧ» (ідэнтыфікатары youtube.com/@aliaksandrakhanevich  і youtube.com/channel/UCuh0ijxvGgMhCEbtaxBxQ5g).

Суд Чыгуначнага раёна Віцебска 16 траўня прызнаў «экстрэмісцкім» сайт грамадзянскай ініцыятывы «Честные люди» (ідэнтыфіктар honestby.org). «Ствараем медыяпрадукты і праводзім інфармацыйна-адукацыйныя кампаніі, абвяргаючы прапаганду і прасоўваючы дэмакратычныя каштоўнасці», — паведамляе пра сябе ініцыятыва.

У той самы дзень суд Цэнтральнага раёна Мінска пастанавіў лічыць «экстрэмісцкім» акаўнт у Tik­Tok з назвай «belarusnovosti1» (ідэнтыфікатар tiktok.com/@belarusnovosti1). Старонка мае амаль 8 тысяч падпісчыкаў, размешчаныя там відэаролікі прысвечаныя палітычным беларускім навінам.

15 траўня 2025 года суд Маладзечненскага раёна абвесціў «экстрэмісцкім» Insta­gram-акаўнт «skary­na­press» (ідэнтыфікатар instagram.com/skarynapress). Гэта старонка выдавецтва і кнігарні «Скарына» ў Лондане.