Камітэт па правах чалавека ААН зарэгістраваў скаргу журналіста Вячаслава Лазарава

Падставай для скаргі стала рашэнне суддзі Наваполацкага суда Зінаіды Балаболавай, якая ў траўні 2019 года прызнала Вячаслава Лазарава вінаватым  паводле  ч. 2. арт. 22.9 КаАП (незаконны выраб і распаўсюд прадукцыі СМІ). Суд пакараў журналіста штрафам памерам 637,5 рублёў за тое, што разам з журналісткай Аленай Шабуняй яны ўзялі інтэрв’ю ў жыхароў Наваполацка, размешчанае пасля на сайце belsat.eu У судовым пасяджэнні ні Лазараў, ні Шабуня сваёй віны не прызналі і ад тлумачэнняў адмовіліся.

Вячаслаў Лазараў абскардзіў рашэнне Наваполацкага суда ў Віцебскім абласным і Вярхоўным судах. Але суды вышэйшай інстанцыі адмовіліся абараніць яго правы, якія гарантаваныя дзейнай беларускай Канстытуцыяй і арт. 19 Міжнароднага пакту аб грамадзянскіх і палітычных правах.

За мінулыя два гады — з таго часу, як Вячаслаў Лазараў накіраваў скаргу ў КПЧ ААН, яго неаднаразова затрымлівалі падчас выканання журналісцкай працы, і некалькі сутак ён быў вымушаны правесці пад вартай у ізалятары часовага ўтрымання.