З’явілася новая ініцыятыва МедыяМагістрат з мэтай падтрымкі беларускай блогасферы на YouTube

Кіраўнік праекта «Беларускія Магістраты» Цімох Акудовіч паведаміў у сацсетках пра новы фармат — МедыяМагістрат.

Яго асноўная мэта — развіццё беларускамоўнай блогасферы на YouTube.

«YouTube — гэта сучаснае тэлебачанне, а беларускамоўны кантэнт там па-ранейшаму прадстаўлены ў даволі малой колькасці ніш.

Механіка застаецца класічнай: збіраюць кола ахвочых, гатовых штомесяц выдаткоўваць ад 10 да 100 еўра ў агульную скарбонку. Раз на 2–3 месяцы праводзім конкурс праектаў і супольна вырашаем, куды пойдуць сабраныя грошы».

Такім чынам супольнасць ствараецца павольна, але на доўгі час. Усе рашэнні прымаюцца праз дамоўленасці або галасаванне. Мяркуецца, што праекты павінны стаць самадастатковымі і ўстойлівымі.

Пакуль што далучыцца да Магістрата можна толькі праз яго ўдзельнікаў. Каб далучыцца ці падтрымаць новую ініцыятыву, трэба пісаць наўпрост Цімоху Акудовічу.

Праект з’яўляецца часткай шырокай ініцыятывы «Беларускія магістраты», якая адраджае традыцыі супольнай падтрымкі важных для грамадства спраў.

«Будаваць разам нешта зразумелае». Цімафей Акудовіч – пра Адукацыйны магістрат і пра тое, як нам навучыцца глядзець у будучыню