Хтосьці пад выглядам Мінінфарму пачаў хаваць старонкі ў беларускай «Вікіпедыі»

Заглушка аб блакаванні са спасылкай на Міністэрства інфармацыі Беларусі, якую невядомы карыстальнік дадаваў у артыкулы беларускай «Вікіпедыі». Скрыншот: Уладзіслаў Чаховіч

Пад «забарону» трапілі артыкулы «Сэкс», «Бісексуальнасць», «Парнаграфія», ЛГБТ і «Вясёлкавы сцяг», а таксама тэмы «Аранжавая рэвалюцыя», «Пуцінізм», «Уварванне Расіі ва Украіну», «Пратэсты ў Беларусі» 2017 і 2020–2021 гадоў. Апынуліся ў спісе і артыкулы пра зніклых апанентаў Лукашэнкі – Віктара Ганчара, Анатоля Красоўскага і Дзмітрыя Завадскага, а таксама пра асобаў, якіх могуць падазраваць у датычнасці да гэтых знікненняў: Дзмітрыя Паўлічэнку, Уладзіміра Навумава і Юрыя Сівакова.

Уладзіслаў Чаховіч звярнуў увагу, што акаўнт дзеяў даволі падрыхтавана: для блакавання старонак выкарыстаў спецыяльны тэхнічны прыём, які дазваляе замест звычайнага тэксту артыкулу паказваць наведнікам адно і тое ж паведамленне з лагатыпамі Мінінфарму – зрабіць гэта з першай спробы не так проста нават для дасведчанага рэдактара. Гэта дазволіла Чаховічу выказаць меркаванне, што акаўнт можа быць сапраўды звязаны з афіцыйнымі структурамі.

Пасля таго як гэты акаўнт заблакавалі, а ўсе яго праўкі скасавалі, «выдаленні» працягнуліся ўжо з новага акаўнту пад назвай «МІБ БЕЛАРУСЬ». Пад яго дзеянне трапілі яшчэ артыкулы пра прэзідэнта Украіны Уладзіміра Зяленскага, лозунг «Пуцін – ху*ло!», артыкулы пра такія паняткі, як «дыктатура» і «аўтарытарызм», «БДСМ», «фемдом», «фембой», «трансгендарнасць», «сексуальныя меншасці», «гамафобія».

Першы акаўнт быў створаны праз вугорскую «Вікіпедыю», другі – праз азербайджанскую. Усе ўнесеныя з іх праўкі скасаваныя, аднак не выключана, што спробы «набегу» на беларускую «Вікіпедыю» паўторацца.

«Думаюць, калі ўзяць «галоўнага», ён дасць пароль ад Wikipedia». Чаму прыходзяць па вікіпедыстаў — і чаму яны працягваюць пісаць