МУС прапанавала блакаваць «экстрэмісцкі кантэнт» яшчэ на этапе даследчай праверкі

Пра гэта заявіў намеснік Міністра ўнутраных спраў, начальнік крымінальнай міліцыі Генадзь Казакевіч.

Намеснік Міністра ўнутраных спраў, начальнік крымінальнай міліцыі Генадзь Казакевіч. 2 лютага 2023 года. Фота: МУС

Паводле словаў Казакевіча, «злачыннасць сышла ў «лічбу», з’яўляюцца новыя формы і метады здзяйснення злачынстваў», але цяперашнія заканадаўчыя магчымасці адстаюць ад рэалій сённяшняга дня.

«Таму МУС выступае з ініцыятывай адносна магчымасцяў яшчэ на стадыі даследчай праверкі блакаваць або спыняць паслугі электрасувязі ў тым выпадку, калі будзе ўстаноўлена, што кантэнт спрыяе здзяйсненню злачынства», — цытуе словы намесніка Міністра Telegram-канал  «Совет Республики Национального собрания Республики Беларусь».

Прапанова тычыцца найперш блакавання «экстрэмісцкага» кантэнту, а таксама кантэнту, звязанага з распаўсюджваннем наркотыкаў. Яна ўключана ў  законапраект «Аб змене кодэксаў», які 5 верасня абмяркоўвала экспэртная рада пры Савеце Рэспублікі.

Прэс-служба ведамства паведамляе, што новы законапраект «у асноўным падтрыманы чальцамі экспертнай рады».