Сацсеткі «Аршанскай газеты» змясцілі паклёпніцкі допіс пра Ігара Казмерчака — рэдактара orsha.eu

Адзін і той самы допіс з фотаздымкам Ігара Казмерчака і подпісам, што ён абвешчаны ў вышук, быў размешчаны на старонках «Аршанскай газеты» ў «Одноклассниках» і ў «ВКонтакте». Выкладзеную ў гэтым тэксце інфармацыю рэдактар незалежнага сайта orsha.eu назваў «дыстыляванай хлуснёй».

Галоўны рэдактар orsha.eu Ігар Казмярчак. Фота: «Белсат»

Аповед у сацсетках дзяржаўнай раённай газеты пачынаецца з заявы, нібыта Ігар Казмярчак «вырашыў нагадаць пра сябе з Польшчы» — у сувязі з тым, што ягоны сайт быў прызнаны «экстрэмісцкай інфармацыйнай прадукцыяй». Такім чынам, аўтары допісу пачалі хлусіць з самага першага сказа, кажа Ігар Казмярчак:

«Па-першае, я жыву не ў Польшчы. Па-другое, сцвярджэнне «быў у яго рэсурс» абсалютна не адпавядае рэчаіснасці, бо наш партал і цяпер працягвае абнаўляцца незалежна ад таго, што ён прызнаны «экстрэмісцкім».

І ён ні на дзень не спыніў працу, нават калі я з’ехаў з Беларусі. Аўтары не бянтэжацца хлусіць у адкрытую, сачыняючы пра мяне асабіста нейкія небыліцы. Прыкладам, пішуць, што я назбіраў грошай у сваякоў і родных, а потым з’ехаў, не аддаўшы пазыкі. А што да згадкі пра нейкія пяць тысяч еўра «на псеўдапраекты ад польскіх гаспадароў», то гэта зусім ужо фантазіі. Прычым хваравітыя: падобна, прыдумляючы суму, аўтар увасобіў нейкую сваю ўласную мару пра багацце, якому павінны пазайздросціць не вельмі заможныя жыхары Аршаншчыны».

На думку Ігара Казмерчака, тэкст пра яго і ягоны сайт напісаны выключна дзеля таго, каб запалохаць землякоў. Там, да прыкладу, згадваецца, што рэдактар «прапаноўваў жыхарам рэгіёна перадаваць рознага рода інфармацыю за ўзнагароджанне». Рэчаіснасці гэта не адпавядае ўжо толькі таму, кажа Ігар, што перасылаць «інфарматарам» грошы з‑за мяжы — даволі вялікая праблема. І ўвогуле падобных прапановаў ніколі не было.

Скрыншот допісу

Тым не менш, ягоным землякам пагражаюць нейкім абстрактным «суровым пакараннем», калі яны будуць заўважаныя «ў кантактах з экстрэмістамі».

Адзінае, што насамрэч стварае пагрозу, — гэта рэпосты матэрыялаў з сайта і падпіскі на сацыяльныя сеткі партала orsha.eu, прызнаныя экстрэмісцкімі матэрыяламі судом Оршы і Аршанскага раёна на патрабаванне мясцовай пракуратуры. Таму Ігар Казмярчак яшчэ раз просіць інтэрнэт-карыстальнікаў быць пільнымі і не трапляць пад артыкул пра «распаўсюд экстрэмізму» (частка 2 артыкула 19.11 КаАП).

Згадка пра адміністрацыйную адказнасць за «лайкі» і «здзяйсненне рэпостаў» — адзінае, што з’яўляецца праўдай ў тэксце на старонках дзяржаўнага СМІ, падкрэслівае Ігар Казмярчак. І звяртае ўвагу, што аўтары паклёпніцкага допісу самі парушылі заканадаўства: узялі здымак з ягоным партрэтам не дзе-небудзь, а якраз з «экстрэмісцкага рэсурсу» orsha.eu.