«Удар па польскіх медыях»: скарачэнне фінансавання ставіць пад пагрозу польскія СМІ ў замежжы

У 2026 годзе Сенат урэзаў бюджэт праграмы «Палонія і палякі за мяжой» на 74 мільёны злотых (каля 17,4 мільёна еўра).

Артыкул пра рэпрэсіі супраць інфармацыйнага парталу пра палякаў у Белраусі Znad Niem­na, апублікаваны ў газеце Kuri­er Wilen­s­ki. Фота: kurierwilenski.lt

Рашэнне Сената Польшчы істотна скараціць фінансаванне праграмы падтрымкі палякаў за мяжой можа прывесці да закрыцця шэрагу польскіх медыяў у постсавецкіх краінах. Пра гэта піша «Rzecz­pospoli­ta».

У 2026 годзе Сенат скараціў бюджэт праграмы «Палонія і палякі за мяжой» на 74 мільёны злотых (каля 17,4 мільёна еўра). Частка гэтых сродкаў ішла на падтрымку польскіх рэдакцый, парталаў, радыёстанцый і часопісаў у Беларусі, Літве, Украіне, Латвіі і іншых краінах рэгіёна.

Прадстаўнікі польскіх арганізацый і журналісты б’юць трывогу. Яны сцвярджаюць, што для некаторых рэдакцый гэта азначае фактычны «прысуд смерці».

Асабліва цяжкая сітуацыя склалася ў Беларусі, дзе незалежныя польскія медыя працуюць ва ўмовах рэпрэсій, якія рэжым Лукашэнкі ажыццяўляе ў дачыненні да польскай меншасці.

У матэрыяле згадваецца журналіст і актывіст Саюза палякаў Беларусі Анджэй Пачобут, які правёў некалькі гадоў у беларускай турме і нядаўна быў вывезены ў Польшчу. Выданне падкрэслівае, што польскія медыя на Усходзе выконваюць не толькі інфармацыйную, але і стратэгічную функцыю — супрацьстаяць расійскай прапагандзе і падтрымліваць сувязь польскіх супольнасцяў з Варшавай.

Прадстаўнікі дыяспары заклікаюць польскія ўлады перагледзець рашэнне, бо без падтрымкі многія выданні могуць знікнуць ужо ў найбліжэйшыя месяцы.

Ціханоўская заклікала Еўракамісію захаваць падтрымку беларускіх незалежных СМІ