Улады аб’явілі «экстрэмісцкім фармаваннем» спартовае медыя «Tribuna.com Беларусь»

Як паведамляецца на сайце сілавога ведамства, рашэнне «аб прызнанні групы грамадзян экстрэмісцкім фармаваннем і забароне яго дзейнасці» прынятае 5 снежня 2023 года пад № 35ЭК.

«Трыбуна» (by.tribuna.com, першапачатковая назва goals.by) — найбуйнейшы беларускі спартыўны партал. Аўдыторыя Tri­buna ў Беларусі, паводле інфармацыі ад рэдакцыі, перавышае мільён чалавек у месяц, яшчэ чатыры мільёны чытачоў карыстаюцца штомесяц міжнародным сайтам і мабільнымі пракладаннямі.

Са жніўня 2020 года by.tribuna.com заблакаваны для карыстальнікаў з тэрыторыі Беларусі і дасяжны толькі праз VPN. А ў жніўні 2021 года кантэнт сайта і сацсетак медыярэсурсу былі прызнаныя «экстрэмісцкімі матэрыяламі». Такое рашэнне тады прыняў суд Чыгуначнага раёна Віцебска на патрабаванне абласнога ўпраўлення ГУБАЗіК.

Журналіст выдання Дзмітрый Руто быў затрыманы 1 чэрвеня 2020 года за бел-чырвона-белы шалік у аўтамабілі і пакараны судом на 15 сутак адміністрацыйнага арышту нібыта за незаконнае пікетаванне.

Журналіст Аляксандр Івулін быў затрыманы 3 чэрвеня 2021 года. 19 студзеня 2022 года суддзя Савецкага раёна Мінска Сяргей Шаціла прызначыў  яму два гады калоніі па абвінавачанні ў «арганізацыі і падрыхтоўцы дзеянняў, якія груба парушаюць грамадскі парадак, альбо актыўным ўдзеле ў іх» (ч. 1 арт. 342 КК). У лютым 2023 года Аляксандр Івулін, адбыўшы прысуд цалкам, выйшаў на волю і з’ехаў з Беларусі.

Чытайце яшчэ:

Личные аккаунты нужно держать закрытыми? Изучили советы по безопасности в соцсетях

БАЖ і СЖЛ запрашаюць калег на Форум журналісцкіх арганізацыяў краінаў Балтыі і пераследаваных журналістаў — 7 снежня

«Гумарны, адчайны, адданы сябрам і журналістыцы». Памяці Генадзя Кеснера