Пракурор Магілёўскай вобласці пастанавіў заблакаваць доступ да сайта ініцыятывы INeedHelpBY

Пракурор Магілёўскай вобласці Валерый Куліковіч пастанавіў абмежаваць доступ да сайта сацыяльнай ініцыятывы INeed­Help­BY — ineedhelpby.org.

Падставай для прыняцця такога рашэння сталі нібыта парушэнні інтэрнэт-рэсурсам Закона Рэспублікі Беларусь «Аб сродках масавай інфармацыі».

«У прыватнасці, на партале публікаваліся звесткі аб дыскрэдытацыі дзейнай улады і праваахоўных органаў, загадзя неправамернай легітымізацыі дзеянняў асоб, якія здзейснілі правапарушэнні і злачынствы, у тым ліку шляхам надання ім псеўдастатусу «палітвязняў». Пры выкладзеных абставінах функцыянаванне ўказанага інтэрнет-рэсурсу супярэчыла нацыянальным інтарэсам Рэспублікі Беларусь», — паведамляе сайт Генеральнай пракуратуры.

Паводле ведамства, супрацоўнікі сайта ineedhelpby.org нібыта парушылі патрабаванні артыкула 38 закона «Аб сродках масавай інфармацыі», які забараняе распаўсюд «інфармацыі, накіраванай на прапаганду вайны, экстрэмісцкай дзейнасці альбо інфармацыі, што змяшчае заклікі да такой дзейнасці, ці іншай інфармацыі, распаўсюд якой можа нанесці шкоду нацыянальным інтарэсам Рэспублікі Беларусь».

У мэтах выканання пастановы пракурора Магілёўскай вобласці дзяржаўная інспекцыя Рэспублікі Беларусь па электрасувязі Міністэрства сувязі і інфармацыі абмежавала доступ да названага рэсурсу. Але сайт ineedhelpby.org па-ранейшаму адчыняецца з‑за мяжы і праз VPN.

Каманда праекта INeed­Help­BY каардынуе дапамогу палітзняволеным і іх сем’ям, дапамагае беларусам, якія мусілі пакінуць радзіму праз палітычны пераслед і апынуліся ў цяжкай жыццёвай сітуацыі. 

«Мы верым у прынцып кругазвароту дабра і ўпэўненыя, што чалавек, які атрымаў дапамогу ў цяжкую хвіліну, дапаможа і іншаму ў падобнай сітуацыі. Мы працягваем дапамагаць беларусам і будзем гэта рабіць да таго часу, пакуль гэта будзе неабходна», — гаворыцца на сайце ініцыятывы.

Рашэннем Камітэта дзяржаўнай бяспекі ад 16 студзеня 2024 года «Аб прызнанні групы грамадзян экстрэмісцкім фарміраваннем і забароне яго дзейнасці» супольнасць пад назвай INeed­Help­BY прызнаная экстрэмісцкай з забаронай дзейнасці на тэрыторыі Беларусі.

У пераліку экстрэмісцкіх фарміраванняў, які складае Міністэрства ўнутраных спраў, пад нумарам 176 згадваюцца таксама і інтэрнэт-рэсурсы, звязаныя з дзейнасцю праекта. Гэта сайт ineedhelpby.org, а таксама групы ў сацыяльных сетках: 

• facebook.com/ineedhelpby;
• instagram.com/ineedhelp_by;
• бот у Telegram з ідэнтыфікатарам t.me/IneedHelpBY_bot;
• канал на відэахостынгу youtube.com/@ineedhelpby820.