Распаўсюднікаў улётак караюць за парушэнне закона «Аб СМІ»

Таццяну Сячко затрымалі 12 жніўня г.г. падчас распаўсюду па паштовых скрынях  улётак, прысвечаных “Народнаму рэферэндуму”. Намеснік начальніка аддзела аховы і прафілактыкі правапарадку Аршанскага РАУС Сяргей Бязлюдаў склаў на актывістку пратакол за парушэнне арт. 22 9 ч.2 КаАП (“незаконны выраб і распаўсюд прадукцыі СМІ”). 11 верасня суддзя аршанскага суда Алеся Дранькова прысудзіла Т. Сячко штраф у 40 базавых велічынь (каля 450 еўра), палічыўшы прэтэнзіі міліцыі абгрунтаванымі.

Не згодная з рашэннем жанчына звярнулася са скаргай у Віцебскі абласны суд, а таксама ў Міністэрства інфармацыі – з пытаннем, ці можна лічыць улёткі “сродкам масавай інфармацыі” (узор улётак быў прыкладзены). Намеснік міністра Уладзімір Матусевіч адказаў, што дасланая прадукцыя з’яўляецца неперыядычным выданнем і таму не лічыцца СМІ. Ліст з Мінінфармацыі на рашэнне Віцебскага абласнога суда не паўплываў, хаця і быў далучаны да матэрыялаў справы.

Гродзенскую актывістку Вольгу Крапоціну затрымаў 19 верасня ў цэнтры горада чалавек у цывільным,  калі яна раздавала мінакам улёткі з тэкстам “Верните Крым! Руки прочь от Украины” і “Ганьба здраднікам Радзімы з “трыкалорам” у зубах. Пуцін вам далонь пацісне, як уздыме на штыках!”. Тады В. Крапоціну пратрымалі пару гадзін у РАУСе, забралі ў яе 17 улётак “на экспертызу”, а потым па месцы яе жыхарства правялі ператрус і забралі ноўтбук і дзве флэшкі.

11 лістапада маёр міліцыі Алег Кока завітаў да актывісткі і прынёс ёй разам з вынікам экспертызы забраных раней улётак пратакол пра нібыта здзейсненае ёй парушэнне арт. 22.9 ч. 2 КаАП. Найбліжэйшым часам яе чакае выклік у суд.

Такім чынам, падкрэсліваюць юрысты ГА “БАЖ”, па арт. 22. 9 ч. 2 КаАП, які прадугледжвае адказнасць за парушэнне закона “Аб СМІ”, караюць распаўсюднікаў матэрыялаў, што СМІ ніяк не з’яўляюцца.   

Раней у гэтым годзе штрафамі паводле арт. 22. 9 КаАП каралі ў асноўным распаўсюднікаў маланакладных выданняў.

У красавіку Смаргонскі раённы суд аштрафаваў на 3 мільёны рублёў мясцовага актывіста Уладзіміра Шульжыцкага за распаўсюд маланакладнага бюлетэня «Смаргонскі грак».

У тым жа месяцы Георгія Станкевіча з Бешанковічаў аштрафавалі на 7 мільёнаў рублёў за распаўсюд самвыдатаўскай газеты “Крывінка”.

У жніўні суддзя суда Магілёўскага раёна Станіслаў Леўчанка пакараў штрафам у памеры 30 базавых велічынь рэдактара газеты “Наш Магілёў” Ігара Барысава. Суд прызнаў яго вінаватым у парушэнні закона “Аб СМІ” і незаконным распаўсюдзе друкаванай прадукцыі (арт. 22.9 ч.2 КаАП), хоць сам журналіст сцвярджаў, што ён не распаўсюджваў газету “Наш Магілёў” і бюлетэнь “Сацыял-дэмакрат”, а проста перавозіў іх у асабістым аўтамабілі.

Даведка:

Арт. 22.9. КаАП: “Парушэнне заканадаўства аб сродках масавай інфармацыі”.

Ч.2. арт 22.9 КаАП: “Парушэнне вызначанага парадку рассылкі абавязковых бясплатных асобнікаў перыядычных друкаваных выданняў, распаўсюду эратычных выданняў, апублікавання сродкам масавай інфармацыі абвяржэння, а роўна незаконны выраб і распаўсюд прадукцыі сродкаў масавай інфармацыі”.

Штраф – ад 20 да 50 базавых велічыняў.