У рэдакцыі “Газеты Слонімскай” зладзілі для дзяцей экскурсію. На настаўніцу «наехалі» чыноўнікі!

Няўрымслівыя чацвёртакласнікі са сваёй настаўніцай прыйшлі ў рэдакцыю паглядзець, як робіцца сучасная газета і як мясцовыя навіны трапляюць на сайт выдання.

— А там у вас што? — паказвае рукой на лесніцу ў падвальнае памяшканне дапытлівы хлапчук.

— А сам як думаеш?

— Падвал.

— Правільна. А ў падвале ў нас знаходзіцца сервер рэдакцыі. Ведаеце, што такое сервер? — уваходжу ў ролю настаўніка.

— Гэта галоўны камп’ютар! — наперабой адказваюць адразу некалькі вучняў.

…Так пачалася экскурсія. Амаль за гадзіну часу дзеці ўбачылі, як нашы журналісты Мікіта Пастухоў, Алёна Алько, Таццяна Плахетка і Уладзімір Шумель пішуць на камп’ютары тэксты навінаў і матэрыялаў ды падбіраюць да іх фотаздымкі. Потым паглядзелі ды паслухалі, як тыя матэрыялы вычытвае стыль-рэдактар Жанна Плешко, як рэдактар сайта Дзмітрый Міцкевіч публікуе іх на сайце газеты.

Калі ж дзеці паглядзелі на маніторы, як вярстаецца газета, убачылі, як выходзіць з прынтара гатовая газетная старонка ды паслухалі аповед  нашага дызайнера Віталя Емельянава, як ён адпраўляе праз інтэрнэт звярстаную газету ў Гродзенскую друкарню, то на пытанне, хто з вас хоча рабіць газету, калі вырасце, падняўся лес рук.

Напэўна, экскурсія для кагосьці з сённяшніх школьнікаў можа стаць штуршком да будучай прафесіі — прафесіі журналіста. І нам, тым хто робіць “Газету Слонімскую”, прыемна было паказаць дзецям нешта для іх новае і, як падалося, цікавае.

Але самае прыемнае — школьнікам у нашай рэдакцыі сумна не было. Значыць, ёсць надзея, што будучыня інфармацыйнай прасторы Слонімшчыны забяспечаная. Бо недарэмна ж кажуць, што дзеці — наша будучыня!

P.S. У пятніцу, 3‑га лютага, настаўніца патэлефанала ў рэдакцыю «ГС» і паведаміла, што на яе пачаўся ціск начальства на працы. Педагог сказала, што ад яе ва ўлітыматыўнай форме запатрабавалі, каб з сайта «ГС» былі выдаленыя фотаздымкі, на якіх дзеці трымаюць у руках апошні нумар газеты.

Рэдактар «ГС» Віктар Валадашчук звязаўся па тэлефоне спачатку з загадчыцай аддзела адукацыі Слонімскага райвыканкама Тэрэсай Юшкевіч, а пасля з дырэктаркай СШ №3 і пацікавіўся, у чым прычына ціску на настаўніцу. Аднак і загадчык аддзела адукацыі, і дырэктар школы запэўнівалі рэдактара «ГС», што пра ціск на педагога яны ўпершыню чуюць цяпер ад яго, а рэпартаж на сайце gs.by  ім спадабаўся. Тым не менш, рэдакцыя «ГС» пайшла насустрач просьбе педагога і зняла з рэпартажа некаторыя фотаздымкі.

Фота gs.by