«Амбудсмен» БСЖ Шпакоўскі: «Затрымліваць і дастаўляць у міліцыю — абсалютна законная працэдура»
28 лістапада 2020
«Амбудсмен па правах журналіста» пры праўладным Беларускім саюзе журналістаў Аляксандр Шпакоўскі падтрымаў практыку затрыманняў падчас асвятлення масавый акцый.
«Калі капаць глыбока, журналіст «Радыё Свабода» — не журналіст, а актывіст», — заявіў старшыня Белтэлерадыёкампаніі Іван Эйсмант у «Клубе рэдактараў».
Шпакоўскі рашуча падтрымаў яго:
«Тое самае датычыцца шэрагу электронных рэсурсаў, супрацоўнікі якіх называюць сябе журналістамі. Аднак адпаведнага статуса і акрэдытацыі Міністэрства інфармацыі не маюць. Тым не менш яны з’яўляюцца на акцыях пратэсту ў Мінску і іншых гарадах.
Па сутнасці яны не асвятляюць акцыі, а ўдзельнічаюць і каардынуюць гэтыя мерапрыемствы. Па сутнасці, мадэруюць. І суправаджаюць інфармацыйна. Адпаведна, іх затрымліваюць, дастаўляюць у аддзяленне міліцыі для далейшага разбіральніцтва. Працэдура, на мой погляд, выглядае абсалютна законная».
@bajmedia
