Як працуе ботаферма «Мінскай праўды»
Пра арганізацыю працы праўладных прапагандыстаў расказаў «Белпол».
![](https://baj.media/wp-content/uploads/2024/05/boty_1-jpg-webp.webp)
Фота: Наша Ніва
У распараджэнні «Белпола» апынулася метадычка «Крызісныя сітуацыі ў інфармацыйнай прасторы Мінскай вобласці», якая была падрыхтавана медыяхолдынгам «Мінская праўда».
У ёй расказваецца аб спосабах змагання з непажаданай інфармацыяй. Гэтую работу каардынуе Упраўленне па рабоце з рэгіянальнымі СМІ медыяхолдынга.
![](https://baj.media/wp-content/uploads/2024/05/boty_2-jpg-webp.webp)
Схема арганізацыі працы прапагандыстаў па правядзенні «інфармацыйных аперацый». Скрын відэа osbbelpol / YouTube
З ім працуюць усе творчыя падраздзяленні холдынга, а таксама ўласныя карэспандэнты «Мінскай праўды», якія ёсць у кожным раёне вобласці і звязаныя з мясцовымі ідэолагамі. Акрамя іх па замове Упраўлення працуюць блогеры, якія робяць выгляд, што не звязаны з дзяржаўнай газетай.
Для стварэння масавых каментароў выкарыстоўваецца ўласная ботаферма, якая схаваная пад шыльдай тэхнічнага аддзела холдынгу.
Як адзначана ў метадычцы, шмат якія чаты і каналы ў сацыяльных сетках належаць рэдакцыі «Мінскай праўды» і выкарыстоўваюцца ў ідэалагічных мэтах.
Акрамя гэтага існуе шэраг сайтаў і каналаў, якія публічна не звязаныя з холдынгам і працуюць нібыта самі на сябе. Прапагандысты спадзяюцца, што такім чынам «могуць уздзейнічаць на не вельмі лаяльнае да ўлады насельніцтва».
У метадычцы прыводзіцца кароткі алгарытм рэагавання на нязручную інфармацыю. Такая дзейнасць разглядаецца як «інфармацыйная аперацыя» прапагандыстаў. Для яе каардынацыі выкарыстоўваецца закрыты чат.
![](https://baj.media/wp-content/uploads/2024/05/boty_3-jpg-webp.webp)
Алгарытм, як рэагаваць на інфанагоды ў недзяржаўных СМІ і чатах. Скрын відэа osbbelpol / YouTube
Пасля аналізу інфармацыі выпрацоўваюцца варыянты рэакцыі. Гэта можа быць ці «ўдар на апярэджанне», ці «перахоп інфармацыйнага парадку дня».
У першым выпадку галоўнае — пераключыць увагу людзей на іншую рэзанансную падзею. У выпадку, калі «атака ўжо пачалася», у СМІ і сацыяльных сетках неадкладна публікуецца інфармацыя, якая адлюстроўвае афіцыйную пазіцыю ўлады па гэтым пытанні. Акрамя гэтага ставіцца задача «рэгулярнага дынамічнага насычэння інфармацыйнай прасторы сухімі фактамі, лічбамі».
![](https://baj.media/wp-content/uploads/2024/05/boty_4-jpg-webp.webp)
Фэйкам прапаганда часта называе непажаданую інфармацыю. Скрын відэа osbbelpol / YouTube
Адпаведна метадычцы, распаўсюджанне інфармацыі павінна адбывацца не толькі праз афіцыйныя каналы інфармацыі, але і праз чаты.
Да гэтага падключаюць блогераў. Ім ставіцца задача стварыць «вірусны» відэакантэнт, «асновай якога могуць стаць эмоцыі і гнеў падманутых фэйкам людзей» ці каментары блогераў.
Да работы з каментарамі таксама далучаюцца супрацоўнікі тэхнічнага аддзела холдынгу. Асноўная задача — публікацыя ў неафіцыйных крыніцах інфармацыі (тэлеграм-каналах, якія не звязаныя з аблвыканкамам і «Мінскай праўдай») пастоў, якія зняважліва адклікаюцца аб працы дэмакратычных СМІ. Пры неабходнасці «выкарыстоўваецца размоўная жаргонная лексіка».
Калі інфармацыйны парадак дня перахоплены, то наступным крокам становіцца «ўкараненне ў масавую свядомасць грамадзян уласнага інфармацыйнага парадку, які задае ў тым ліку і ўласныя правілы інфармацыйнай гульні».
![](https://baj.media/wp-content/themes/baj/assets/images/telegram-logo.jpg)